《大人囡a2詩》

 | | | 轉寄

Lâng ū Siangbīn...人有雙面

作者 Li KhinhoaN 2005.11.27

listen
Hō͘ lí khòaⁿ góa ê bīn chhiòhaihai
Hō͘ 你看我ê 面笑haihai；
M̄ hō͘ lí khòaⁿ góa ê bīn lâu ba̍ksái
M̄ hō͘ 你看我ê 面流目屎
Hō͘ lí khòaⁿ góa ê bīn pe̍h ná siùchâi
Hō͘ 你看我ê面白ná秀才;
M̄ hō͘ lí khòaⁿ góa ê bīn o͘ koh pháiⁿ
M̄ hō͘ 你看我ê 面烏 koh 歹
Hō͘ lí khòaⁿ góa ê chiàⁿbīn chiok kongchhái
Hō͘ 你看我ê 正面足光彩；
M̄ hō͘ lí khòaⁿ góa ê pōebīn chin àusái
M̄ hō͘ 你看我ê 背面真àusái

Hō͘ lí khòaⁿ góa ê chêngbīn thàipêngtāi
Hō͘ 你看我ê 前面太平代;
M̄ hó͘ lí khòaⁿ góa ê āubīn chò hongthai
M̄ hō͘ 你看我ê 後面做風颱
Hō͘ lí khòaⁿ góa ê téngbīn kek m̄ chai
Hō͘ 你看我ê 頂面kek m̄ 知；
M̄ hō͘ lí khòaⁿ góa ê lāibīn phi̍hpho̍kchhái
M̄ hō͘ 你看我ê 內面phi̍hpho̍kchhái
M̄ hō͘ lí khòaⁿ góa ê tobīn ē kâng thâi
M̄ hō͘ 你看我ê 刀面會kâng thâi；
Hō͘ lí khòaⁿ góa ê tobīn hó chhiatchhài
Hō͘ 你看我ê 刀面好切菜
To ū nn̄g bīn lí kám m̄ chai?
刀有兩面你kám m̄ 知？
2003/5/3 Harvard