《哈佛台語筆記》

 | | | 轉寄

哈佛台語學生

作者 李勤岸 2007.07.22

過年初二，in就轉來學校準備功課。寒假干單18工，這12工tī學校備考，期尾考了開學。哈佛ê學期制度真特殊，先放寒假才轉來期尾考。按呢設計可能是beh hō͘學生一直持續學習，bē學學leh，放一個長假，所學ê攏peh上樹啊。有人笑講其實加害學生chhitthô bē放心，冊koh讀bē落去。聽講這是早期美國大學ê傳統，後來逐個學校攏改做tī學期尾期尾考，考了歸心放假，m̄是tī後學期開學進前考頂學期ê試。

哈佛ê期尾考是由學校行政單位負責考，m̄是老師家己考。老師愛tī頂學期kā考卷交hō͘註冊組。備考ê期間愛tī學校hō͘學生隨時會當請教。

不過，學生人數tī 20人以下ê課會使申請免除，老師家己考就好。初級語言課學校規定以10人一班為原則。台語初級班正式註冊有15人，我無愛台語課成做in期尾考ê負擔，申請家己考。其實，初級台語嘛無法度交hō͘哈佛ê行政人員替我考。

初期班除了註冊生，旁聽ê有三個，總共18人。照講應該拆做二班，不過台語老師干單我一個，無法度，只好做一班上。本底koh khah濟人，本底有beh kah 30人。學校想講台語應該無甚物學生修，今年不過試看覓ê性質，這是哈佛創校365年第一遍beh試看台語敢開會成？我家己嘛攏無把握。到底會有偌濟人來修？會有甚物款學生來修？語言部ê行政助理Rosie講無管幾個學生攏beh開班，免煩惱。Koh來就愛成長，學生ê註冊率愛提升。若是學生註冊人數增加，就繼續開，若無，就停止。講beh試三冬，若成功，就beh繼續，無，就請我轉去台灣食家己。

第一工上課，來到教室，足細間ê seminar教室，上加會當容納10人。我開始tī烏枋頂貼台灣地圖kap世界語言地圖。第一節課我beh先介紹台灣這個國家，伊ê人民kap文化。抵貼好，oa̍t頭，已經客滿，人koh一直來。顯然，這間教室已經傷小。有人自動出去chhōe看猶有別間教室無，有khah大間ê無。有。Koh有一間真大間，會當容納三、四十人。我koh kā地圖拆起來，貼過彼間大教室。

講演了，分卡片hō͘ in寫基本資料，背景、學習動機。然後，分班。初期班干單beh收台語bē曉聽、bē曉講ê人，若是聽有、加減會曉講，愛去中級班。二十九人內底約有chiâⁿ 10個聽有，我kā in編tī中級。初期班用英語上課，中級班用台語。

我kā行政助理Rosie講beh開中級班，伊講bē當tī開學以後才另外開新課程。我走去kā主任要求。隔工，行政助理講學校同意我開中級班。不過，無加薪水。時間當然愛重chhiâu，chhiâu無大家攏妥當ê時間。最後chhun三個會當上。三個嘛是愛開，因為今年若有開中級班，明年就會當要求開高級班。

第一禮拜是shopping period，學生會四界試聽，所以逐工下課愛去行政辦公室門口填人數。

Rosie一直交代m̄通hō͘學生旁聽。會當註冊ê學生除了哈佛本校以外，會當接受MIT、Brown、Tulfs這三間學校ê學生過來註冊，其他ê學校bē使。伊講台灣人社區可能真興奮，有真濟學生看報紙報導，khà電話hō͘伊，講beh來旁聽，伊攏kā in拒絕啊。這是學校ê政策，因為hō͘人旁聽對開錢註冊ê人無公平。而且，旁聽生學習bē hiah認真，對教學造成困擾。

蘭芳是波士頓大學ê學生，第二遍上課走來kā我講伊beh旁聽，我kā講已經傷大班，我bē當答應。結果伊逐遍攏來上課，ùi波士頓市區坐半點鐘ê車來。我無法度kā伊趕出去。

鈺君kap君淳是客人，台灣來ê研究生，三禮拜後才入來，註冊期間已經過。應該是另外彼個客人紀君紹介來ê。紀君講伊是台灣人，bē曉台語感覺真見笑，beh kā台語學hō͘好。本來是beh kā in講kā我教客語做交換，講bē出嘴。

有一擺上課講著認同，hō͘ in講是甚物人。有ê講是美國人、有ê講台灣人，我kā in教一個新名詞，叫做台美人。敢koh有其他ê認同？有人講是中國人。

敏慧是中國人，第二代廣東人，會曉華語、廣東話，今年beh畢業啊，想beh koh學台語。

宇光嘛是今年beh畢業，時常飛出去chhōe頭路，m̄ koh逐擺攏主動約時間來補，學kah會曉為止。過年ê時寫電子批來，m̄是用英語，是用台語羅馬字寫。寫規段ê，無半字m̄著。伊會當提著我ê詩集做獎品。第一名。

詩涵寒假轉去台灣chhōe阿媽，in阿媽歡喜kah，因為伊會曉講台語，叫伊chah一kheh仔台灣麻糬來hō͘我。伊學台語ê動機就是為著beh kap阿媽講話。

信達ùi洛杉磯寫批來問伊ê成績，in父母選舉ê時轉去台灣，看著有候選人唸我ê詩，用我ê『海翁宣言』做競選海報。伊講感覺足光榮，in父母講伊會曉講台語是今年hō͘ in上好ê聖誕禮物。伊會當提著我ê『海翁宣言』海報做獎品。伊第二名。

傑培、婷梅、瑋中kap立康攏會當提著詩海報，開學我就答應in前五名beh送詩海報，第一名送精裝詩選。

最後一節課in演出話劇。一個月前，有學生家己kā我建議ê。我一開始想講抵學三個月就beh演劇，敢有可能？上課ê時罔提議，無人反對。就hō͘ in家己分組，每組分配一個中級班ê學生做導演。家己利用課外時間寫劇本、彩排。In ê劇本說明用英語，對話用台語羅馬字，用台語軟體TP拍字。

全程演出有拜託一個學生錄影起來。我看kah gānggāng，足m̄敢相信，學三個月竟然會當寫出chiah心適ê劇本，有chiah精彩ê表演？

2002/1/9初稿

（Chit篇本底是《哈佛台語筆記》輯一 Journal•筆記－哈佛校園聽著台語 ê 鐘聲 第 15 篇）