《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第七章

作者 巴克禮普世版小組 2011.05.08

1) M̄ thang phoephêng lâng, chiah bián tú tio̍h phoephêng.
2) Inūi lín ēng símmi̍h phoephêng lâi phoephêng, iā boeh ánne siū phoephêng; lín ēng símmi̍h niû lâi niû, iā boeh ánne niû hō͘ lín.
3) Koh lí cháiⁿiūⁿ khòaⁿ tio̍h hiaⁿtī ba̍kchiulāi ê chháu'áiù, iā bô siūⁿ lí ba̍kchiulāi ê îⁿ'áchhâ ah?
4) Beh cháiⁿiūⁿ kā lí ê hiaⁿtī kóng, Lí ba̍kchiulāi ê chháu'áiù hō͘ góa kā lí the̍hkhílâi, iā lí ba̍kchiulāi kèngjiân ū îⁿ'áchhâ ah?
5) Kéhó ê lâng ah, tāiseng the̍hkhì lí ba̍kchiulāi ê îⁿ'áchhâ, chiah ōe bêngbêng khòaⁿ tio̍h thang the̍hkhì hiaⁿtī ba̍kchiulāi ê chháu'áiù.
6) M̄ thang ēng sèng ê mi̍h hō͘ káu, iā m̄ thang ēng lín ê chinchu hiat tī ti ê thâuchêng; kiaⁿliáu in ēng kha ta̍h i, oa̍tlìntńg lâi kā lín.
7) Kiû chiū hō͘ lín, chhōe chiū tú tio̍h, phah mn̂g chiū kā lín khui.
8) Inūi kìⁿnā kiû ê tit tio̍h; chhōe ê tú tio̍h; phah mn̂g ê, chiū kā i khui.
9) Lín tiongkan ū símmi̍h lâng, i ê kiáⁿ kā i thó piáⁿ, kiám boeh ēng chio̍hthâu hō͘ i?
10) á sī boeh ti̍h hî, kiám boeh ēng chôa hō͘ i?
11) Lín chiahê suijiân pháiⁿ, iáukú ōe hiáutit ēng hó mi̍h hō͘ lín ê kiáⁿjî, hôhòng lín tī thiⁿténg ê Pē, kiám bô boeh ēng hó mi̍h hō͘ kiû I ê lâng mah?
12) Só͘í lín kìⁿnā ài lâng khoánthāi lín ê, lín iā tio̍h ánne khoánthāi lâng; inūi che sī lu̍thoat kap sianti.
13) Lín tio̍h tùi hit ê oe̍h mn̂g ji̍p; inūi thàu kàu bia̍tbô ê, hit ê mn̂g khoah, hit ê lō͘ tōa tiâu, tùi hia ji̍p ê lâng chōe.
14) Thàu kàu oa̍h ê, hit ê mn̂g oe̍h, hit ê lō͘ sòe tiâu, chhōe tio̍h ê lâng chió.
15) Kínsīn tîhông ké ê sianti, in chiūkūn lín, gōabīn sī iûⁿko, lāibīn sī hiôngok ê chhâilông.
16) Lín boeh tùi in ê kóechí lâi bat i; kiám tùi chhìphè bán phûtô, tùi chi̍tlê bán bûhoakó mah?
17) Ánne kìⁿnā hó chhiū kiat hó kóechí; pháiⁿ chhiū kiat pháiⁿ kóechí.
18) Hó chhiū bōe kiat pháiⁿ kóechí, pháiⁿ chhiū bōe kiat hó kóechí.
19) Kìⁿnā chhiū bô kiat hó kóechí ê, chiū chhò i, hiatlo̍h hóe.
20) Só͘í lín boeh tùi in ê kóechí lâi bat i.
21) Kìⁿnā chhengho͘ góa kóng, Chú ah, Chú ah ê, bô choânpō͘ ji̍p Thiankok; chíū kiâⁿ góa tī thiⁿténg ê Pē ê chíì ê, chiah ōe.
22) Tng hit ji̍t chē chē lâng boeh kā góa kóng, Chú ah, Chú ah, goán kiám m̄ sī ēng lí ê miâ thoân kàu, ēng lí ê miâ kóaⁿ kúi, ēng lí ê miâ kiâⁿ chōechōe koânlêng mah?
23) Chiū hit sî góa boeh bêngbêng kā in kóng, Góa lóng m̄ bat lín; chò puthoat ê, tio̍h līkhui góa khì.
24) Só͘í kìⁿnā thiaⁿ góa chiahê ōe lâi kiâⁿ ê, boeh píphēng tìsek ê lâng, khí i ê chhù tī chio̍hpôaⁿ téng;
25) hō͘ lo̍h, tōa chúi kàu, hong chhe, chhiong tio̍h hit keng chhù, iā bô tó; inūi tē ki tī chio̍hpôaⁿ téng.
26) Kìⁿnā thiaⁿ góa chiahê ōe, bô kiâⁿ ê, boeh píphēng gōng lâng, khí i ê chhù tī soa téng;
27) hō͘ lo̍h, tōa chúi kàu, hong chhe, chhiong tio̍h hit keng chhù, chiū tó; koh i ê tó sī siongtiōng.
28) Iâso͘ kóng chiahê ōe soah, chèng lâng kîkoài I ê kàsī.
29) Inūi I kàsī lâng, chhinchhiūⁿ ū koânlêng ê, bô chhinchhiūⁿ in ê kengha̍kkàusu.