《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第一章

作者 巴克禮普世版小組 2014.03.02

1 Kèngài ê Thêohuilô tāijîn, tī góa siá ê thâu chi̍tpún chheh ū chiong Iâso͘ tùi khíthâu só͘ chò kah só͘ kàsī ê tāichì, 2 itti̍t kàu I thongkòe SèngSîn ê tōalêng kàsī só͘ kéngsoán ê sùtô͘ liáuāu, I siū chiap chiūⁿthiⁿ ê ji̍t. 3 Iâso͘ siūhāi liáuāu, ū ēng chinchē chèngkì hiánbêng I teh oa̍h. Tī sìcha̍p ji̍t ê tiongkan, I hiánhiān hō͘ sùtô͘ khòaⁿ, tùi in kóng khí SiōngChú Koktō͘ ê tāichì. 4 Iâso͘ kah sùtô͘ chòhóe ê sî, hoanhù in, kóng, "M̄ thang līkhui Iâlō͘satléng, chiàu Góa chêng kā lín kóng ê, tio̍h thènghāu ThiⁿPē ê èngín. 5 Iokhān ēng chúi kā lâng sélé, m̄ koh koh bô kúi ji̍t, lín ē siū SèngSîn ê sélé."

Iâso͘ Siūchiap Chiūⁿthiⁿ
6 Sùtô͘ kah Iâso͘ chūchi̍p ê sî, mn̄g kóng, "Chú ah, Lí beh tī chitmá hôeho̍k Íseklia̍t ê ôngkok sībô?" 7 Iâso͘ ìn kóng, "ThiⁿPē koattēng kakī koânpèng ê sîkan kah kihōe m̄ sī lín ē tàng chai.ê. 8 M̄ koh SèngSîn lîmkàu lín ê sî, lín ē tit tio̍h lêngle̍k, tī Iâlō͘satléng, Iûthài choântē kah Satmálīa, ti̍tkàu thiⁿpiⁿ háikak ūi Góa lâi chò kiànchèng." 9 Chiahê ōe kóng soah, in teh khòaⁿ ê sî, Iâso͘ siū chiap chiūⁿthiⁿ. Ū hûn chiap I khì, in chiū bô khòaⁿkìⁿ I. 10 In iáuteh chùba̍k khòaⁿ Iâso͘ chiūⁿthiⁿ ê sî, hutjiân ū nn̄gê chhēng pe̍hsaⁿ ê lâng khiā tī in sinpiⁿ, 11 kóng, "Kalīlīlâng ah, lín náē khiā tī chia teh khòaⁿ thiⁿ? Chitūi līkhui lín siū chiap chiūⁿthiⁿ ê Iâso͘, lín khòaⁿ I ánne chiūⁿthiⁿ, I mā ē chiàu ánne koh lâi."

Chhútāi Iûtāi ê Chitbū
12 Jiânāu hiahê sùtô͘ tùi hitê kiòchò Kannásoaⁿ ê só͘chāi tńgkhì Iâlō͘satléng. Chitê só͘chāi lī Iâlō͘satléng iok chi̍t konglí, sī Anhiohji̍t ē tit kiâⁿ ê lō͘chām. 13 In ji̍psiâⁿ liáuāu, chiū peh khílih in tòa ê lâuténg tōathiaⁿ. Tī hia ū Pítek, Iokhān, Ngákok, Anteklia̍t, Huile̍k kah Tomá, Patolômái kah Máthài, Ale̍khui ê kiáⁿ Ngákok kah Selôtí ê Sebûn, kah Ngákok ê kiáⁿ Iûtāi. 14 Chiahê lâng, kah kúināê hūjînlâng, íki̍p Iâso͘ ê lāubú Málīa, chham I ê hiaⁿtī, lóng tângsim ha̍pì pekchhiat kîtó. 15 Bô kúiji̍t āu, chhaputto chi̍tpah jīcha̍p lâng ê sìntô͘ teh chūchi̍p ê sî, Pítek khiā khílâi kóng, 16 Hiaⁿtī chímōe ah, SèngSîn thongkòe Tāipi̍t ê chhùi só͘ īgiân koanhē Iûtāi chhōa lâng lia̍h Iâso͘ ê tāichì ittēng tio̍h ènggiām. 17 Iûtāi púnlâi sī goán tiongkan ê chi̍tê, koh ū hūn kah goán chòhóe kangchok." 18 Taⁿ chitê lâng ēng i chò putgī ê tāichì só͘ tit tio̍h ê kangchîⁿ bé chi̍ttè tē, i tòthâuchai sí tī hia, paktó͘ piakli̍h, tn̂g'átō͘ lóng lâu chhutlâi. 19 Tòa tī Iâlō͘satléng ê lâng lóng chai chithāng tāichì, só͘í chiàu in ê ōe kā hittè tē kiòchò Akektāimá, chiūsī ' Hoehhn̂g' ê ìsù. 20 Inūi Siphian ū kìchài: Hō͘ i ê chhù phahng, Bôlâng tī hia tòa.( chù: SPh 69:25) Koh ū kìchài:

Tio̍h hō͘ pa̍tlâng lâi tāithè i ê chitbū.( chù: SPh 109:8)
21 " Só͘í tio̍h tī thâu kàu bóe kah lán chòhóe ê lâng tiongkan, soán chi̍tê lâi kah goán tàutīn chò Iâso͘ kohoa̍h ê kiànchèngjîn. 22 Hitê lâng tio̍h tùi Iokhān sélé khaisí, kàu Iâso͘ līkhui lán siū chiap hit ji̍t, lóng ū siôngsiông kah goán chòtīn ê lâng." 23 In chiū thêmiâ nn̄g lâng, chiūsī kiòchò Pasatpa mā kiòchò Iûsūto͘ ê Ioksek, koh chi̍tê sī Máthêa. 24 Chiū kîtó, kóng, "Chú ah, Lí chai ta̍klâng ê sim, kiû Lí chísī chit nn̄g lâng tiongkan tó chi̍tê sī Lí kéngsoán ê, 25 beh lâi tamtng sùtô͘ ê chithūn, inūi Iûtāi hòngkhì chitê chithūn, khì kiâⁿ i kakī ê lō͘." 26 Jiânāu in liamkhau liam tio̍h Máthêa. I chiū kaji̍p cha̍pitê sùtô͘ ê hânglia̍t.