《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十二章

作者 巴克禮普世版小組 2014.05.18

Hilu̍t Pekhāi Kàuhōe
1 Chhaputto hit sî, Hilu̍t ông hē chhiú hāmhāi chi̍tkóa kàuhōe ê lâng. 2 Ēng to thâisí Iokhān ê hiaⁿko Ngákok. 3 I khòaⁿchhut chitê tāichì hō͘ Iûthàilâng hoaⁿhí, chiū koh sòa lo̍hkhì lia̍h Pítek. Chitê tāichì tī Tûkàⁿcheh ê kîkan hoatseng. 4 I lia̍h tio̍h Pítek chiū kā i koaiⁿ lo̍hkaⁿ, kau hō͘ sì pan ê peng kò͘siú, múi pan sì lâng. Hilu̍t ànsǹg beh tī Pôaⁿkòecheh āu tòa i chhutlâi, tī chènglâng ê bīnchêng kā i símphòaⁿ. 5 Pítek chiū ánne hō͘ lâng koaiⁿ tī kaⁿni̍h, m̄ koh kàuhōe thè i pekchhiat tùi SiōngChú kîtó.

Pítek Chhut Kaⁿ
6 Hilu̍t tehbeh tòa i chhutlâi símphòaⁿ ê chêng chi̍t mê, Pítek hō͘ lâng ēng nn̄gtiâu thihliān'á liānteh, khùn tī nn̄gê peng ê tiongkan, koh ū kéngōe tī mn̂ggōa teh kò͘siú. 7 Hutjiân ū Chú ê thiⁿsài khiā tī piⁿ'á, pânglāi ū kng teh chiò. Thiⁿsài tah Pítek ê kengthâu kā i kiòchhéⁿ, kóng, "Kín khílâi!" Thihliān'á chiū tùi i ê chhiú lak lo̍hkhì. 8 Thiⁿsài kā i kóng, "Tio̍h hâ tòa, chhēng ôe." Pítek chiàu ánne chò. Thiⁿsài koh kóng, "Moa lí ê gōasaⁿ, tòe góa lâi!" 9 Pítek chiū chhutlâi tòe thiⁿsài khì. m̄ chai thiⁿsài teh chò ê sī chinsi̍t ê, lia̍hchò sī khòaⁿ tio̍h īⁿsiōng. 10 In kengkòe kò͘siú ōepeng ê tē it koan kah tē jī koan, lâikàu ji̍psiâⁿ ê thihmn̂g hitê mn̂g chūtōng khui. In chiū chhutkhì, kiâⁿ kòe chi̍ttiâu ke, thiⁿsài sûisî līkhui Pítek. 11 Pítek chhéⁿ khílâi, kóng, "Taⁿ góa chinchiàⁿ chai, Chú chhe I ê thiⁿsài kiù góa thoatlī Hilu̍t ê chhiú kah Iûthàilâng choânpō͘ ê kèbô͘." 12 Pítek siūⁿ chhengchhó chitê tāichì liáuāu, chiū khì mā kiòchò Mákhó ê Iokhān ê lāubú Málīa ê chhù. Tī hia ū chinchē lâng chūchi̍p teh kîtó. 13 Pítek phah gōakháumn̂g ê sî, ū chi̍tê miâkiò Lôtāi ê chabó͘gín'á chhutlâi thiaⁿ khòaⁿ sī símmi̍h lâng. 14 I jīnchhut Pítek ê siaⁿ, hoaⁿhí kah bē kò͘tit khui mn̂g, cháu ji̍pkhì pòkò kóng Pítek khiā tī mn̂gkhakháu. 15 M̄ koh in tùi i kóng, "Lí teh khísiáu o͘pe̍hkóng!" Chabó͘gín'á kianchhî kóng ūiáⁿ. In chiū kóng, "Ánne ittēng sī Pítek ê thiⁿsài." 16 Pítek koh itti̍t phah mn̂g. In khui mn̂g khòaⁿ tio̍h Pítek, chin tio̍hkiaⁿ koh kîkoài. 17 Pítek iô chhiú kiò in mài chhut siaⁿ, chiū kā in soatbêng Chú ánchóaⁿ chhōa i chhut kaⁿ. Koh kóng, "Tio̍h chiong chiahê tāichì kā Ngákok kah chèng sìntô͘ kóng." Kóng soah chiū līkhui khì pa̍t só͘chāi. 18 Kàu thiⁿ kng ê sî, khànsiú ê penga m̄ chai Pítek tóūi khì, chiū loānchhauchhau. 19 Hilu̍t phài lâng khì chhōe, m̄ koh lóng chhōe bô. I chiū símmn̄g kò͘siú ê peng'á, kiatkó bēnglēng kā in thoa chhutkhì thâi. Chitê tāichì liáuāu, Hilu̍t chiū līkhui Iûthài, lo̍hkhì Kaisatlīa tòa.

Hilu̍t ê Síbông
20 Hilu̍t tùi Chhuilô kah Setùn ê lâng huisiông siūkhì. Hiahê lâng liânha̍p phài lâng khì kìⁿ Hilu̍t, chiū pàithok ôngkiong ê chóngkoán Peklahsūto͘ khì kiû hô, inūi in ê niûsi̍t tio̍h tùi ông koánhat ê tē khu lâi kiòngèng. 21 Tī ioktēng ê ji̍tchí, Hilu̍t chhēng ôngho̍k chē tī ôngūi, tùi jînbîn iánkáng. 22 Jînbîn hoah: "Che sī SiōngChú ê siaⁿ, m̄ sī lâng ê siaⁿ." 23 Hilu̍t bô kui êngkng hō͘ SiōngChú, Chú ê thiⁿsài sûisî kā i phahtó. I chiū hō͘ thâng kā síkhì. 24 M̄ koh SiōngChú ê tōlí jú thoân jú khoah, jú hengōng. 25 Panápa kah Sòlô oânsêng in ê jīmbū liáuāu, chiū tùi Iâlō͘satléng tńgkhì, chhōa kiòchò Mákhó ê Iokhān chòhóe khì.