《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十章

作者 巴克禮普世版小組 2014.07.13

Pólô Khì Mákîtùn kah Hila̍h
1 Jiáuloān pêngchēng liáuāu, Pólô tiàuchi̍p bûntô͘, kā in kó͘lē. Kah in siosî chiū chhuthoat khì Mákîtùn. 2 I kengkòe hiahê tē khu, kóng chinchē ōe kā in kó͘lē, chiū khì Hilia̍p, 3 tī hia tòa saⁿgoe̍h ji̍t liáuāu, i beh chē chûn khì Sūlīa ê sî. Iûthàilâng kèbô͘ beh hāi i, i chiū káipiàn hêngtêng tùi Mákîtùn tńgkhì. 4 Tòe i khì Aseaséng ê lâng, ū Pìlíalâng Pitlō͘ ê kiáⁿ Só͘pátek, Thiapsatlônîkalâng Alíta̍tkó͘ kah Sekongto͘, Te̍kpìlâng Kaiiû kah Thêmô͘thài; koh ū Asealâng Chhuikikó͘ kah Te̍klôhuimô͘. 5 Chiahê lâng seng chhuthoat, tī Te̍klôa thènghāu goán. 6 Kòeliáu Tûkàⁿcheh, goán tùi Huili̍ppí khui chûn, gō͘ ji̍t āu lâikàu Te̍klôa, kah in hōeha̍p, tī hia tòa chhit ji̍t.

Pólô Chòeāu Chi̍t Pái Khì Te̍klôa
7 Chhit ji̍t ê thâuchi̍t ji̍t, goán tāike chūhōe peh piáⁿ ê sî, inūi Pólô kehtńgji̍t chiū beh līkhui, chiū kah in kánglūn tōlí kóng kàu pòaⁿmê. 8 Goán teh chūhōe ê lâuténg ū tiám chinchē tenghóe. 9 Ū chi̍tê siàuliânlâng, miâkiò Iûchhuikó͘, chē tī thang'ámn̂g. Pólô kèsio̍k kánglūn chin kú, siàuliânlâng soah khùn lo̍hbîn, tùi saⁿchànlâu poa̍h lo̍hlâi. Tāike kā i hû khílâi ê sî, íkeng sí à. 10 Pólô lo̍hkhì lâukha phak tī i ê sengkhu kā i lámteh, kóng, "M̄ bián hoânló, i iáu oa̍hteh." 11 Pólô chiū koh khílih lâuténg peh piáⁿ lâi chia̍h, kèsio̍k kah in tâmlūn chin kú; kàu thiⁿkng chiah līkhui. 12 In kā hitê oa̍h khílâi ê siàuliânlâng chhōa tńgkhì, tāike tit tio̍h chintōa ê anùi.

Tùi Te̍klôa Khì Bílīto͘
13 Goán seng chē chûn khì Asok, thang tī hia chiap Pólô, inūi i beh tùi lio̍klō͘ khì hia, ū ánne kā goán hoanhù. 14 Pólô tī Asok kah goán hōeha̍p, goán chiū chiap i chiūⁿ chûn khì Bíchhuilīnî. 15 Goán tùi hia khui chûn, tē jī ji̍t lâikàu Kio ê tùibīn. Kehtńgji̍t chûn tī Satmô͘ khòhōaⁿ, koh kòe chi̍t ji̍t lâikàu Bílīto͘. 16 Pólô koattēng bô beh khì Íhutsó͘, chiah bián tī Aseaséng lōnghùi sîkan. I beh kóaⁿkín khì Iâlō͘satléng, khòaⁿ ē tàng tī Gō͘sûncheh íchêng kàu ábē.

Pólô Khoànbián Íhutsó͘ ê Tiúⁿló
17 Pólô tùi Bílīto͘ chhe lâng khì Íhutsó͘, chhiáⁿ kàuhōe ê tiúⁿló lâi. 18 In lâi kàuūi, Pólô chiū tùi in kóng, "Lín kakī chai, góa tùi lâikàu Aseaséng hit ji̍t khí itti̍t kàu chitmá, góa ánchóaⁿ kah lín chòhóe sengoa̍h. 19 Góa siū tio̍h Iûthàilâng ê bô͘hāi chhìliān, iáukoh khiampi lâu ba̍ksái teh ho̍ksāi Chú. 20 Tùi lín ū līek ê, bôlūn tī kûnchiòng ê bīnchêng á sī tī kòpia̍t ê katêng, góa m̄ bat bô kā lín thoân, bô kā lín kà. 21 Tùi Iûthài kah Hilia̍plâng, góa lóng giâmsiok khoànbián in tio̍h ǹg SiōngChú lâi hóekái, koh sìn lán ê Chú Iâso͘ Kitok. 22 Taⁿ góa sūnho̍k SèngSîn ê chísī beh khì Iâlō͘satléng, m̄ chai tī hia ē tú tio̍h símmi̍h tāichì. 23 M̄ koh góa chai, SèngSîn tī ta̍kê siâⁿ tùi góa kéngkò, kóng ū kaⁿga̍k kah hoānlān teh thènghāu góa. 24 Ūi tio̍h beh kiâⁿ oân góa ê lō͘chām, oânsêng Chú Iâso͘ kautài góa ê jīmbū, thang chèngbêng SiōngChú untián ê hokim, góa oânchoân bô sioh kakī ê sèⁿmiā." 25 "Góa pêngsiông tī lín tiongkan sìkè kiâⁿ lâi thoân SiōngChú ê Koktō͘, taⁿ góa chai íāu lín bē tàng koh kìⁿ góa ê bīn. 26 Só͘í góa kin'áji̍t tùi lín kóng chhengchhó, nā ūlâng tîmlûn, m̄ sī góa ê chekjīm, 27 inūi góa íkeng chiong SiōngChú ê chíì choânpō͘ thoân hō͘ lín. 28 Lín tio̍h kakī kínsīn, mā tio̍h chiàukò͘ SèngSîn kautài lín chò kàmtok ê iûⁿkûn, lâi bo̍kióng SiōngChú ê kàuhōe, chiūsī I ēng kakī ê hoeh só͘ sio̍khôe.ê. 29 Góa chai góa līkhui liáuāu, ē ū hiongok ê chhâilông ji̍pkhì lín tiongkan sionghāi iûⁿkûn. 30 Sīmchí tī lín kakī ê tiongkan, ē ūlâng chhutlâi khiokkái chinlí, íniú sìntô͘ lâi tòe in. 31 Só͘í lín tio̍h kéngséng, ē kìtit góa saⁿnî kú mêji̍t lâu ba̍ksái lâi khoànkái lín ta̍klâng." 32 "Taⁿ góa kā lín kauthok hō͘ SiōngChú, thang tùi I untián ê sìnsit hō͘ lín tit tio̍h chōchiū, mā hō͘ lín kah hiahê sènghòa kuiChú ê sìntô͘ chòhóe sêngchiap I siúⁿsù ê hokhūn. 33 Góa m̄ bat tham lâng ê chîⁿgîn á sī saⁿkhò͘. 34 Lín kakī chai, góa ēng siangchhiú chòkang lâi kiongkip kakī kah tângphōaⁿ ê suiàu. 35 Góa chò lín ê bô͘iūⁿ, tio̍h phahpiàⁿ chòkang lâi pangchō͘ loánjio̍k ê lâng, mā tio̍h ē kìtit Chú Iâso͘ kóng ê ōe, kóng, 'Hō͘ lâng ê, pí niásiū ê khah ū hokkhì.'" 36 Pólô kóng soah, kūi lo̍hkhì kah kûnchiòng chòhóe kîtó. 37 Tāike tōasiaⁿ khàu, kā Pólô lámteh, kā i chim. 38 Pólô kóng, "Íāu bē tàng koh kìⁿ tio̍h i ê bīn" chitkù ōe hō͘ in huisiông siongsim. Liáuāu in chiū sàng i chiūⁿ chûn.