《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第九章

作者 巴克禮普世版小組 2011.05.29

1, Iâso͘ lo̍h chûn koe3hai2, khì kàu I ê pún siâⁿ.
2, Tútn̄g ū lâng kng chi̍t ê piànsūi ê tó tī pho͘'áni̍h lâi chiūkūn I; Iâso͘ khòaⁿ tio̍h in ê sìn, chiū kā piànsūi ê kóng, Kiáⁿ ah, chò lí ansim, lí ê chōe sià à.
3, Ū kengha̍kkàusu kúinā lâng simlāi kóng, Chitê lâng chhiàmkoân lāmsám kóng.
4, Iâso͘ chai in ê simì, chiū kóng, Lín siáⁿsū simlāi khǹg pháiⁿ ìsù ah?
5, Kóng, Lí ê chōe sià, á sī kóng, Khílâi kiâⁿ, tóūi chi̍t hāng khah khoài?
6, Tānsī boeh hō͘ lín chai, Jînchú tī tē ni̍h ū koân thang sià chōe, chiū kā piànsūi ê kóng, Khílâi, giâ lí ê pho͘'á, tńgkhì lí ê chhù.
7, I chiū khílâi, tńgkhì i ê chhù.
8, Chèng lâng khòaⁿ tio̍h chiū kiaⁿ; kui êngkng Siōngchú, chiūsī ēng chit chióng koân hō͘ lâng ê.
9, Iâso͘ tùi hia kengkè, khòaⁿ tio̍h chi̍t lâng, miâ Máthài, chē tī hiòngkoan; chiū kā i kóng, Tè góa; i chiū khílâi tòe I.
10, Iâso͘ chē toh tī i ê chhù, ū chē chē thiusòe ê kap pháiⁿ lâng lâi, kap Iâso͘ chham I ê bûntô͘ tâng chē.
11, Hoatlīsàiphài ê lâng khòaⁿ tio̍h, kā I ê bûntô͘ kóng, Lín siansiⁿ siáⁿsū kap thiusòe ê íki̍p pháiⁿ lâng saⁿkap chia̍h?
12, Iâso͘ thiaⁿ tio̍h chiū kóng, Ióngkiāⁿ ê lâng bô khiàmēng iseng, chíū phòapēⁿ ê chiū tio̍h.
13, Tānsī, Góa ài lînbín, m̄ ài chèsū, chit kù símmi̍h ìgī, lín tio̍h khì o̍h. Inūi góa lâi m̄ sī boeh chio gī lâng, sī boeh chio pháiⁿ lâng.
14, Hit sî Iokhān ê bûntô͘ chiūkūn I kóng, Goán kap Hoatlīsàiphài ê lâng ta̍uhta̍uh kìmchia̍h, tānsī lí ê bûntô͘ bô kìmchia̍h, sī cháiⁿiūⁿ?
15, Iâso͘ kā in kóng, Sinkiáⁿsài kap hōchhōa ê lâng saⁿkap tīteh, hōchhōa ê lâng kiám ē aisiong mah? chíū sîji̍t boeh kàu, sinkiáⁿsài tùi in tiongkan síkhì, hit sî in chiū boeh kìmchia̍h.
16, Bô lâng ēng sin pò͘ pó͘ kū saⁿ; inūi só͘ pó͘ ê hit tè, ē kiùli̍h hit niá saⁿ, i ê phòakhang koh khah tōa.
17, Lâng iā bô ēng sin chiú té tī kū phôelông; nā sī ū, chiū lông li̍h, chiú lāu, lông iā sòa pháiⁿ; chíū ēng sin chiú té tī sin phôelông, chiū nn̄g hāng lóng póchoân.
18, Kóng chiahê ē ê sî, tútn̄g ū chi̍t ê koaⁿ lâi pài I kóng, Góa ê chabó͘kiáⁿ tú'á sí, tānsī lí lâi ēng chhiú bong i, i chiū ē oa̍h.
19, Iâso͘ khílâi tòe i khì, I ê bûntô͘ iā khì.
20, Tútn̄g ū chi̍t ê hūjînlâng, hiatlāu cha̍pjī nî, kiâⁿ óa I ê kachiahāu, bong I saⁿ'áku ê chhiu;
21, inūi i simlāi phahsǹg kóng, Góa kanta bong I ê saⁿ, chiū ē hó.
22, Iâso͘ oa̍ttńgsin, khòaⁿ i chiū kóng, Hūjînlâng ah, chò lí ansim, lí ê sìn hō͘ lí hó à; tùi hit sî hūjînlâng chiū hó.
23, Iâso͘ kàu hit ê koaⁿ ê chhù, khòaⁿ tio̍h pûn ta̍t'á ê, iā ū chèng lâng teh khàu;
24, chiū kóng, Thèkhì, inūi chabó͘ gínná m̄ sī sí, sī teh khùn. In chiū léngchhiò I.
25, Íkeng kóaⁿ chèng lâng chhut, chiū ji̍pkhì, khan i ê chhiú; chabó͘ gínná chiū khílâi.
26, Chitê hongsiaⁿ piàn thoân tī hit ê tē hng.
27, Iâso͘ tùi hia kengkè, ū nn̄g ê chhiⁿmî lâng tè I, kiò kóng, Tāipi̍t ê kiáⁿsun, lînbín goán.
28, Íkeng ji̍p chhù, chhiⁿmî lâng chiūkūn I. Iâso͘ kā in kóng, Lín sìn góa ē chò chitê sū mah? Ìn kóng, Chú ah, ū.
29, I chiū bong in ê ba̍kchiu kóng, chiàu lín ê sìn, kā lín chò chiâⁿ.
30, In ê ba̍kchiu chiū khui. Iâso͘ giâmgiâm hoanhù in kóng, Kínsīn bo̍htit hō͘ lâng chai.
31, Tānsī in chhutkhì, piàn thoân I ê miâ tī hit tē hng.
32, In chhutkhì ê sî, tútn̄g ū lâng chhōa chi̍t ê ékáu hoān tio̍h kúi ê lâi chiūkūn Iâso͘.
33, Kúi íkeng kóaⁿ chhut, ékáu ê chiū kóng ōe; hiahê chèng lâng lóng kîkoài kóng, Íseklia̍t tiong bē bat khòaⁿ tio̍h ánne.
34, Tānsī Hoatlīsàiphài ê lâng kóng, I óakhò kúiông lâi kóaⁿ kúi.
35, Iâso͘ piàn kiâⁿ chiahê siâⁿ chiahê hiuⁿsiā, tī in ê hōetn̂g kàsī lâng, thoân Thiankok ê hokim, ihó ta̍k chióng ê chèngthâu, ta̍k chióng ê pēⁿthiàⁿ.
36, I khòaⁿ tio̍h hiahê chèng lâng, chiū khólîn in; inūi in khùnkhó͘ sìsòaⁿ, chhinchhiūⁿ iûⁿ bô bo̍kchiá.
37, Tùi ánne chiū kā I ê bûntô͘ kóng,
38 Thang siusêng ê sī chōe, chò kang ê sī chió; só͘í lín tio̍h kiû hn̂g Chú pek kang khì kā I siusêng.