《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十四章

作者 巴克禮普世版小組 2014.08.10

Iûthàilâng Khòngkò Pólô
1 Gō͘ji̍t āu, chèsitiúⁿ Anánîa kah kúināê tiúⁿló íki̍p chi̍tê lu̍tsu Thiapthó͘lô, lâikàu Kaisatlīa. In tùi Huile̍ksu chóngtok khòngkò Pólô. 2 Pólô siū tiàu chhuttêng, Thiapthó͘lô chiū khaisí khòngkò, kóng, "Huile̍ksu tāijîn, goán tùi lí ê hiânbêng tīlí tit tio̍h thàipêng. Lí koh ū siankiàn chibêng, hō͘ kokka tit tio̍h káikek kah chìnpō͘. 3 Lí ê tekchèng hō͘ goán ta̍ksî ta̍kūi kámsiā putchīn. 4 Taⁿ góa m̄ káⁿ tamgō͘ lí siuⁿ kú, kiû lí khoaniông lâi thiaⁿ goán kúi kù ōe. 5 Goán ū chhâchhut chitê lâng ná chhinchhiūⁿ une̍k, tī choânsèkài ê Iûthàilâng tiongkan ínkhí jiáuloān, i sī Násatle̍któng ê thâuba̍k. 6 Liân sèngtiān i to beh kā i ùòe. Goán chiū kā i lia̍h khílâi, siūⁿbeh chiàu goán kakī ê lu̍thoat kā i símphòaⁿ. 7 Bôphahsǹg, iâⁿtiúⁿ Lūsea lâi kansia̍p, chiong i tùi goán ê chhiútiong kiông chhiúⁿkhì, bēnglēng kò i ê lâng tio̍h lâi lí chia. 8 Chhiáⁿ lí chhinsin kā i símmn̄g, chiū ē bêngpe̍k goán kò i ê ta̍khāng tāichì. 9 Chāitiûⁿ ê Iûthàilâng lóng chham lo̍hkhì khòngkò i kóng, "Tāichì khaksi̍t sī ánne."

Pólô Ūi Kakī Piānhō͘
10 Chóngtok tìm thâu kiò Pólô tappiān. I chiū kóng, "Góa chai lí chipchèng símphòaⁿ ànkiāⁿ chinchē nî, só͘í góa hoaⁿhí tī lí ê bīnchêng ūi kakī piānhō͘. 11 Lí tiâucha chiū ē chai, góa chiūⁿ Iâlō͘satléng kèngpài kàu taⁿ chíputkò cha̍pjī ji̍t. 12 Iûthàilâng pēngbô khòaⁿ tio̍h góa tī tiānlāi kah lâng piānlūn, mā bô khòaⁿ tio̍h góa tī hōetn̂g á sī siâⁿlāi siàntōng bînchiòng. 13 In mā bē tàng tùi lí the̍hchhut chitmá teh kā góa khòngkò ê chèngkì. 14 M̄ koh góa tio̍h tùi lí sêngjīn chi̍thāng tāichì, chiūsī góa chiàu in khòaⁿchò īⁿtoan ê Tōlō͘ lâi ho̍ksāi goán chó͘sian ê SiōngChú. Góa mā ū siongsìn Mô͘se ê lu̍thoat kah tī sianti ê chheh só͘ kìchài.ê. 15 Góa tùi SiōngChú ū khǹg kah in kāngkhoán ê ǹgbāng, chiūsī bôlūn gīlâng kah putgī ê lâng lóng ē tùi sí kohoa̍h. Che mā sī in kakī só͘ teh himbō͘ ê tāichì. 16 Inūi ánne, góa tùi SiōngChú kah tùi lâng, lóng póchhî chhengpe̍k ê liôngsim. 17 Góa līkhui Iâlō͘satléng kúinā nî, taⁿ koh tńglâi sī beh chínchè tôngpau, koh hiàn lémi̍h. 18 In tī sèngtiān khòaⁿ tio̍h góa ê sî, góa íkeng oânsêng kiatchēnglé. Hit sî, pēngbô kûnchiòng, mā bô jiáuloān. 19 Kanta ū kúināê tùi Aseaséng lâi ê Iûthàilâng tī hia. In nā beh kò góa, engkai kakī lâi lí ê bīnchêng kò góa chiah tio̍h ah. 20 Nā bô góa khiā tī gīhōe teh sinsò͘ ê sî, in tio̍h chíchhut góa ū símmi̍h m̄ tio̍h ê só͘chāi. 21 Chíū chi̍thāng tāichì ē tàng kā góa khòngkò, chiūsī góa bat khiā tī in tiongkan tōasiaⁿ hoah: 'Góa kin'áji̍t siū lín símphòaⁿ sī ūi tio̍h sílâng kohoa̍h ê tāichì.'" 22 Huile̍ksu tùi chitê Tōlō͘ ê tāichì siongtong chhengchhó, chiū soanpò͘ thètêng, kóng, "Tán iâⁿtiúⁿ Lūsea lo̍hlâi ê sî, góa chiah lâi phòaⁿkoat lín ê ànkiāⁿ." 23 JIânāu Huile̍ksu bēnglēng liântiúⁿ kò͘siú Pólô, mā hō͘ i tāmpo̍h'á chūiû hêngtōng, mā chún i ê pêngiú sàng i suiàu ê mi̍hkiāⁿ lâi hō͘ i.

Pólô Tī Huile̍ksu kah Thó͘selah Bīnchêng
24 Kòe kúinā ji̍t liáuāu, Huile̍ksu kah i ê bó͘ Thó͘selah chòhóe lâi, i sī Iûthàilâng, chiū kiò Pólô chhutlâi, in àibeh thiaⁿ Pólô kánglūn sìn Kitok Iâso͘ ê tōlí. 25 Pólô kóngkàu konggī, chiatchè kah chionglâi ê símphòaⁿ ê sî, Huile̍ksu putchí kiaⁿ, ìn kóng, "Taⁿ lí hó chhutkhì à. Ū kihōe chiah koh chhiáⁿ lí lâi." 26 Lēnggōa i mā ǹgbāng Pólô ē siap gîn hō͘ i, só͘í siôngsiông tiàu i lâi, kah i tâmlūn. 27 Kòe nn̄g nî, Phokiû Huisuto͘ sòachiap Huile̍ksu chò chóngtok. Huile̍ksu ūi tio̍h beh hō͘ Iûthàilâng hoaⁿhí, kèsio̍k kā Pólô koaiⁿ tī kaⁿni̍h.