《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十四章

作者 巴克禮普世版小組 2014.12.14

M̄ thang Phoephêng Lâng
1 Sìnsim nńgchiáⁿ ê lâng, lín tio̍h kā i chiapla̍p, m̄ thang kah i piānlūn ū chenggī ê tāichì. 2 Ūlâng sìn ta̍khāng lóng thang chia̍h, m̄ koh sìnsim nńgchiáⁿ ê lâng kantaⁿ chia̍h chhàise. 3 Ta̍khāng chia̍h ê lâng m̄ thang khòaⁿkhin bô ta̍khāng chia̍hê lâng, bô ta̍khāng chia̍hê lâng m̄ thang phoephòaⁿ ta̍khāng chia̍hê lâng, inūi SiōngChú íkeng ū chiapla̍p i. 4 Lí sǹg símmi̍h, náē phoephòaⁿ pa̍tlâng ê chheēng? In khiāchāi á sī poa̍htó, in ê chúlâng ē kā in koansim. In ē khiāchāi, inūi Chú ē kā in pangchō͘. 5 Ūlâng khòaⁿ chitji̍t pí pa̍tji̍t khah tiōngiàu, ūlâng khòaⁿ ta̍kji̍t lóng siosiāng tiōngiàu. Ta̍klâng simlāi tio̍h ū kakī ê kiànkái. 6 Siú te̍kpia̍t ji̍tchí ê lâng sī ūi tio̍h Chú lâi siú, ta̍khāng lóng chia̍h ê lâng mā sī ūi tio̍h Chú lâi chia̍h, inūi i kámsiā SiōngChú. Bô ta̍khāng chia̍h ê lâng māsī ūi tio̍h Chú lâi bô chia̍h, i mā sī ū kámsiā SiōngChú. 7 Lán bôlâng kantaⁿ ūi tio̍h kakī teh oa̍h, mā bôlâng kantaⁿ ūi tio̍h kakī lâi sí. 8 Lán oa̍h sī ūi tio̍h Chú teh oa̍h, sí mā sī ūi tio̍h Chú lâi sí, só͘í lán bôlūn sī oa̍h á sī sí, lóng sī sio̍k Chú ê lâng. 9 Ūi tio̍h chitê bo̍ktek, Kitok ū sí mā ū kohoa̍h, thang tôngsî chò oa̍hlâng kah sílâng ê Chú. 10 Kìjiân sī ánne, lí náē phoephòaⁿ lí ê hiaⁿtī? Náē khòaⁿkhin lí ê hiaⁿtī? Inūi lán lóng tio̍h khiātī SiōngChú símphòaⁿse̍k ê thâuchêng. 11 Sèngkeng ū kìchài: Chú kóng, "Góa sī éngoa̍h ê SiōngChú, só͘ū ê khathâuu lóng ē kā Góa kūipài, só͘ū ê chhùi lóng ē soanpò͘ sêngjīn Góa sī SiōngChú.”( chù: ISA 45:23) 12 Ánne, lán ta̍klâng tio̍h chiong kakī ê tāichì tī SiōngChú ê bīnchêng soatbêng chhengchhó.

M̄ thang Hō͘ Sìntô͘ ê Sìngióng Poa̍htó 13 Só͘í lán m̄ thang koh hō͘siōng phoephêng. Tio̍h koatsim m̄ thang hō͘ hiaⁿtī chó͘gāi, poa̍htó á sī hoānchōe. 14 Góa chai Chú Iâso͘ hō͘ góa khaksìn, ta̍khāng mi̍h púnsin lóng chhengkhì, m̄ koh lâng nā lia̍h símmi̍h chò bô chhengkhì, hithāng mi̍h tùi hit lâng lâi kóng chiū bô chhengkhì. 15 Lí nā ūi tio̍h chia̍hmi̍h ê tāichì hō͘ lí ê hiaⁿtī simkoaⁿ kankhó͘, lí ê hêngûi chiū m̄ sī chhuttī thiàⁿsim. Lí m̄ thang ūi tio̍h kakī só͘ chia̍h, lâi pāihoāi Kitok ū thè i sí ê lâng. 16 Só͘í m̄ thang hō͘ lín khòaⁿchò hó ê tāichì chiâⁿchò hō͘ lâng húipòng ê tùisiōng. 17 Inūi SiōngChú ê Koktō͘ kah limchia̍h bô koanhē, sī kah SèngSîn só͘ siúⁿsù ê konggī, hôpêng íki̍p hílo̍k ū koanhē. 18 Chiàu ánne lâi sūhōng Kitok ê lâng ē hō͘ SiōngChú hoaⁿhí, mā ē hō͘ lâng oló. 19 Só͘í lán tio̍h tuikiû hôpêng kah hō͘siōng chōchiū ê tāichì. 20 M̄ thang ūi tio̍h chia̍hmi̍h lâi húihoāi SiōngChú ê kangchok. Ta̍khāng chia̍hmi̍h lóng chhengkhì, m̄ koh lâng nā inūi chia̍hmi̍h hō͘ lâng ê sìngióng chó͘gāi chiū m̄ hó. 21 Siōnghó sī bô chia̍h bah, bô lim chiú, mā bô chò hō͘ hiaⁿtī sìngióng poa̍htó ê tāichì. 22 Lí tùi tāichì ê sìnliām, sī lí kah SiōngChú tiongkan ê tāichì. Chò kakī khòaⁿchò tio̍h ê tāichì koh bô chōeokkám ê lâng, si̍tchāi ū hokkhì. 23 M̄ koh simlāi ū giâugî lâi chia̍h ê lâng ē siū tēngchōe, inūi in m̄ sī chhuttī sìnsim. M̄ sī chhuttī sìnsim lâi chò ê lóng sī chōe.