《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第九章

作者 巴克禮普世版小組 2015.03.01

Sùtô͘ ê Koânlī kah Chekjīm
1 Góa kám bô chūiû? Góa kám m̄ sī sùtô͘? Góa kám m̄ bat khòaⁿ tio̍h lán ê Chú Iâso͘? Lín kám m̄ sī góa ūi Chú chòkang ê sêngkó? 2 Tùi pa̍tlâng lâi khòaⁿ góa kiámchhái m̄ sī sùtô͘, tùi lín lâi kóng góa khaksi̍t sī, inūi lín kah Chú kiatliân chiūsī góa chò sùtô͘ ê chèngkì. 3 Tùi hiahê phoephêng góa ê lâng, góa ánne ūi kakī piānkái. 4 Goán kám bô koân thang lim thang chia̍h? 5 Goán kám bô koân kah kîtha ê sùtô͘, Chú ê hiaⁿtī íki̍p Pítek kāngkhoán, thang chhōa sìn Chú ê chímōe chò bó͘ lâi chòhóe líhêng? 6 Kám kantaⁿ góa kah Panápa ittēng tio̍h chòkang chiah ē tàng sengoa̍h? 7 Kám ūlâng teh chòpeng koh chia̍hkakī? Kám ūlâng chai phûtôhn̂g bô chia̍h hn̂glāi chhutsán ê kóechí? Kám ūlâng chhī iûⁿ bô lim hitê iûⁿleng? 8 Góa kóng chiahê kám sī chiàu lâng ê ìkiàn? Lu̍thoat kám m̄ sī mā ánne kóng? 9 Mô͘se ê lu̍thoat kìchài: Gû teh lún ngó͘kok ê sî, m̄ thang kā i kòa gûchhùilom.( chù: SBK 25:4) SiōngChú kám m̄ sī teh koansim gû? 10 Mô͘se kóng chiahê ōe kám m̄ sī ūi tio̍h lán kóng.ê? Tongjiân sī! Inūi kengchoh ê kah siukoah ê lóng khǹg ǹgbāng teh kengchoh, kîthāi chòhóe ū hūn tit tio̍h ngó͘kok. 11 Goán chiong lêngsèng ê chéngchí iā tī lín tiongkan, ánne tùi lín tit tio̍h bu̍tchitsiōng ê kiongkip, kám ū kòehūn? 12 Pa̍tlâng nā ū koân tùi lín iaukiû, goán kám m̄ sī kohkhah ū koân? M̄ koh goán lóng m̄ bat súiōng chitê koân, tiantò jímnāi itchhè, chiah bián hō͘ Kitok ê hokim siū chó͘gāi. 13 Lín lóng chai, tī sèngtiān teh kangchok ê lâng tùi sèngtiān tit tio̍h chia̍hmi̍h; tī chètôaⁿ teh hiànchè ê lâng pun tio̍h chètôaⁿténg ê chèmi̍h? 14 Chhinchhiūⁿ ánne, Chú siathoat hō͘ thoân hokim ê lâng tio̍h tùi hokim ê kangchok lâi tit tio̍h sengoa̍h hùiiōng. 15 M̄ koh góa lóng m̄ bat súiōng chiahê koân. Góa chitmá ánne siá mā m̄ sī ài lâng ánne lâi khoánthāi góa, inūi góa lêngkhó iausí mā bô ài hō͘ góa só͘ khoakháu ê tāichì piànchò iúbêng bûsi̍t. 16 Góa thoân hokim pēng bô símmi̍h thang khoakháu. Góa sī hōng bēnglēng teh thoân, inūi nā bô thoân hokim, góa chiū ē ū chaihō. 17 Góa nā kamsim chò chitê kang chiū ū pòsiúⁿ. Nā m̄ sī chhuttī kamgoān, mā tio̍h chiphêng SiōngChú kautài ê jīmbū. 18 Ánne góa ê pòsiúⁿ sī símmi̍h? Chiūsī góa teh thoân hokim, hō͘ lâng pe̍hpe̍h tit tio̍h hokim. Góa tiantò bô tit tio̍h thoân hokim kaitit ê koânlī. 19 Góa sī chūiû ê lâng, bô siū lâng ê sokpa̍k, m̄ koh ūi tio̍h beh hō͘ khahchē lâng lâi sìn Chú, góa chiâⁿchò chènglâng ê lô͘po̍k. 20 Tùi Iûthàilâng teh kangchok ê sî, góa chiū chhinchhiūⁿ Iûthàilâng, sī beh tit tio̍h Iûthàilâng lâi sìn Chú. Góa suijiân bô sio̍k lu̍thoat koánhat ê lâng, ūi tio̍h beh hō͘ khahchē siū lu̍thoat koánhat ê lâng lâi sìn Chú, góa chiū chhinchhiūⁿ lu̍thoat koánhat ê lâng. 21 Tùi lu̍thoatgōa ê lâng, góa chiū chò lu̍thoatgōa ê lâng, chiah thang tit tio̍h khahchē lu̍thoatgōa ê lâng lâi sìn Chú, ánne m̄ sī kóng góa bô chunsiú SiōngChú ê lu̍thoat, kîsi̍t góa sī siū Kitok lu̍thoat ê koánhat. 22 Tùi sìnsim nńgchiáⁿ ê lâng, góa chiū chiâⁿchò nńgchiáⁿ, sī beh tit tio̍h khahchē nńgchiáⁿ ê lâng lâi sìn Chú. Tùi ta̍kkhoán lâng, góa chiū chiâⁿchò hitkhoán lâng, góa ēng ta̍kchióng honghoat thang ke kiù chi̍tkóa lâng. 23 Góa ánne súiōng ta̍kchióng honghoat lóng sī ūi tio̍h hokim, bo̍ktek sī beh hunhióng hokim ê chiokhok. 24 Lín ittēng chai, tī ūntōngtiûⁿ chhamka písài ê lâng lóng lo̍hkhì cháu, m̄ koh tit tio̍h pòsiúⁿ ê chí ū chi̍tê. Lín tio̍h ánne phahpiàⁿ cháu chiah ē tàng tit tio̍h siúⁿ. 25 Ta̍kê soánchhiú lóng ū chiasiū giâmkeh ê hùnliān, in sī beh tit tio̍h ē pāihoāi ê êngkoan, m̄ koh lán sī beh tit tio̍h bē pāihoāi ê êngkoan. 26 Góa ánne cháu m̄ sī bô bo̍kphiau teh cháu; góa phahkûn m̄ sī teh phah khongkhì. 27 Góa giâmkeh toànliān góa ê sengkhu kàu ē tàng kā i oânchoân khòngchè, chiah bián góa chio lâng lâi chhamka písài, kakī soah hō͘ lâng tôthài tiāu.