《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第十三章

作者 巴克禮普世版小組 2011.06.26

1, Tng hit ji̍t, Iâso͘ tùi chhùlāi chhutkhì, chē tī háipiⁿ.
2, Ū chē chē tīn ê lâng chūchi̍p chiūkūn I, tìkàu I chiūⁿ chûn lâi chē, kui tīn ê lâng lóng khiā tī hōaⁿni̍h.
3, Chiū ēng chōechōe hāng siat phìjū kā in kóng,
4, Lí khòaⁿ, ū iā chéng ê chhutkhì iā chéng; iā ê sî, ūê kala̍uh tī lō͘piⁿ, pechiáu kàu, choânpō͘ chia̍h i;
5, ūê kala̍uh tī chio̍hkeh ê tē, thô͘ chhián ê ūi; inūi thô͘ bô chhim, chiū hoat chin kín;
6, tānsī ji̍t chhut pha̍k i; inūi bô kun, chiū ko͘tâ.
7, Ia̍h ūê kala̍uh tī chhì'álāi, chhì'á hoatkhí jiapè i;
8, ūê kala̍uh tī hó ê thó͘tē, kiatsi̍t, ūê pah pē, ūê la̍kcha̍p pē, ūê saⁿcha̍p pē.
9, Ū hīⁿkhang ê, tio̍h thiaⁿ.
10, Bûntô͘ chiūkūn I kóng, Lí ēng phìjū kā in kóng sī cháiⁿiūⁿ?
11, I ìn kóng, Thiankok ê òbiāu hō͘ lín chai, iā bô hō͘ in.
12, Inūi kìⁿnā ū ê, boeh hō͘ i, chiū i ū chhun; bô ê, liân i só͘ ū ê iā boeh chhiúⁿ i.
13, Só͘í góa ēng phìjū kā in kóng; inūi in khòaⁿ, iā khòaⁿ bô kìⁿ; thiaⁿ, iā thiaⁿ bô hiān, iā bô hiáungō͘.
14, Ísàia só͘ ūgiân ê, sī ènggiām tī in, kóng, Lín thiaⁿ sī boeh thiaⁿ, tānsī choa̍ttùi bô hiáungō͘; Lín khòaⁿ sī boeh khòaⁿ, tānsī choa̍ttùi khòaⁿ bô kìⁿ;
15, Inūi chitê jînbîn sim tūn, Hīkhang tāng, In ê ba̍kchiu pàng khoeh; Kiaⁿliáu in ēng ba̍kchiu khòaⁿ tio̍h, Ēng hīⁿkhang thiaⁿ tio̍h, Ēng sim hiáungō͘, Lâi oa̍tlìntńg, Góa chiū ihó in.
16, Tānsī lín ê ba̍kchiu ū hokkhì, inūi in khòaⁿ tio̍h; lín ê hīⁿkhang ū hokkhì, inūi in thiaⁿ tio̍h.
17, Inūi góa si̍tchāi kā lín kóng, Chêng ū chōechōe sianti kap gī lâng, ài khòaⁿ lín só͘ khòaⁿ tio̍h ê, iā bô khòaⁿ tio̍h; ài thiaⁿ lín só͘ thiaⁿ tio̍h ê, iā bô thiaⁿ tio̍h.
18, Taⁿ chitê iā chéngchí ê ê phìjū, lín tio̍h thiaⁿ.
19, Kìⁿnā thiaⁿ Thiankok ê tōlí iā bô hiáungō͘ ê, hit ê pháiⁿê chiū kàu, chiong só͘ iā tī i ê sim ê chhiúⁿkhì; che sī iā tī lō͘piⁿ ê.
20, Iā tī chio̍hkeh ê tē ê, che sī lâng thiaⁿ tōlí, liâmpiⁿ hoaⁿhí sêngsiū i;
21, tānsī lāibīn bô kun, putkò sī chiāmsî nātiāⁿ; kàu ūi tio̍h tōlí tú tio̍h ū hoānlān pekhāi liâmpiⁿ kha that tio̍h.
22, Iā tī chhì'álāi ê, che sī lâng thiaⁿ tōlí, iā sèkan ê khòalū, chîⁿchâi ê bêhe̍k, jiapè hit ê tōlí, chiū bô kiatsi̍t.
23, Iā tī hó thó͘tē ê, che sī lâng thiaⁿ tōlí lâi hiáungō͘, i si̍tchāi kiatsi̍t; só͘ kiat ê, ūê pah pē, ūê la̍kcha̍p pē, ūê saⁿcha̍p pē.
24, Koh siat phìjū tùi in kóng, Thiankok chhinchhiūⁿ lâng iā hó chéngchí tī i ê hn̂g;
25, lâng khùn ê sî, i ê siûte̍k lâi, iā phōe tī be̍h tiong, chiū khì.
26, Kàu be̍h hoatkhílâi, sòa kiat sūi ê sî, phōe iā chhuthiān.
27, Kechú ê lô͘po̍k lâi kā i kóng, Thâuke ah, lí kiám m̄ sī iā hó chéngchí tī lí ê hn̂g mah? tùi tóūi ū phōe?
28, I kā in kóng, Che chiūsī siûte̍k chò ê. Lô͘po̍k kā i kóng, Lí ài goán khì khau i mah?
29, I chiū kóng, Bô, kiaⁿliáu lín khau phōe, liân be̍h sòa pu̍ihkhílâi.
30, Iôngún nn̄g hāng pîⁿpîⁿ tōa châng, thènghāu siukoah; kàu siukoah ê sî, góa boeh kā koahê kóng, Tāiseng khioh hiahê phōe, hâ kui pé thang sio i; chíū be̍h tio̍h siuji̍p góa ê chhekchhng.
31, Koh siat phìjū tùi in kóng, Thiankok chhinchhiūⁿ chi̍t lia̍p kòachhài chí, lâng the̍h khì iā tī i ê hn̂g;
32, chitê sī pah hāng chéngchí ê tē it sòe; kàu i tōa châng, sī khah tōa lóngchóng ê chhàisoe, sòa chiâⁿ chò chhiū, tìkàu khongtiong ê chiáu lâi hioh tī i ê ki.
33, Koh ēng phìjū kā in kóng, Thiankok chhinchhiūⁿ kàⁿ, hūjînlâng the̍h khì khǹg tī saⁿ táu mīhún ê lāibīn, kàu lóng hoat kàⁿ.
34, Chiahê lóng sī Iâso͘ ēng phìjū kā chèng lâng kóng; nā m̄ sī ēng phìjū, chiū bô só͘ kā in kóng;
35, lâi ènggiām chá thok sianti só͘ kóng ê, kóng, Góa boeh khui chhùi siat phìjū, Chhiánbêng chhòngchō sèkan ílâi só͘ únba̍t ê.
36, Hit sî Iâso͘ hō͘ chèng lâng sìsòaⁿ, chiah ji̍p chhù; I ê bûntô͘ chiūkūn I kóng, Hn̂g ê phōe'á ê phìjū, kā goán kóebêng.
37, I ìn kóng, Iā hó chéngchí ê sī Jînchú; hn̂g chiūsī sèkan;
38, hó chéngchí ê chiūsī Thiankok ê kiáⁿ; phōe, chiūsī pháiⁿê ê kiáⁿ;
39, iā phōe ê siûte̍k, chiūsī Mô͘kúi; siukoah ê sî, sī sèkài ê lō͘bé; koah ê, chiūsī thiⁿsài.
40, Só͘í chhinchhiūⁿ khioh phōe'á lâi ēng hóe sio; tī sèkài ê lō͘bé iā boeh ánne.
41, Jînchú boeh chhe I ê thiⁿsài tùi I ê koklāi siusi̍p kìⁿnā hō͘ lâng kha that tio̍h ê, kap chò puthoat ê;
42, hiat in tī hóelô͘, tī hia boeh ū thîkhàu kāgê chhiatkhí.
43, Hit sî gī lâng boeh hoatchhut kng chhinchhiūⁿ ji̍t, tī in ê Pē ê kok. Ū hīⁿkhang ê tio̍h thiaⁿ.
44, Thiankok chhinchhiūⁿ pópòe khǹg tī hn̂gni̍h; lâng tú tio̍h chiū khǹgba̍t i; inūi hoaⁿhí chiah khì bē itchhè só͘ ū ê, lâi bóe hit khu hn̂g.
45, Koh Thiankok chhinchhiūⁿ senglí lâng chhōe hó ê chu;
46, tú tio̍h chi̍t lia̍p putchí ta̍t chîⁿ ê, chiū khì bē itchhè só͘ ū ê lâi bóe i.
47, Koh Thiankok chhinchhiūⁿ bāng pha tī háini̍h, chūchi̍p ta̍k lūi ê chúicho̍k;
48, íkeng móa, chiū thoa chiūⁿ phiâⁿ; chē teh, khioh hó ê ji̍p khìkū, m̄ hó ê hiatka̍k tī gōabīn.
49, Sèkài ê lō͘bé, iā boeh ánne; chiahê thiⁿsài boeh chhutlâi, tùi gī lâng ê tiongkan lâi hunpiat pháiⁿ lâng;
50, hiat in tī hóelô͘, tī hia boeh ū thîkhàu kāgê chhiatkhí.
51, Chiahê lín lóng ē hiáutit bōe? In kóng, Ōe.
52, I kā in kóng, Só͘í kìⁿnā kengha̍kkàusu chò Thiankok ê bûntô͘ ê, sī chhinchhiūⁿ kechú tùi i ê khò͘pâng the̍hchhut sin kū ê mi̍h ê.
53, Iâso͘ íkeng kóng chiahê phìjū bêngpe̍k, chiū līkhui hia.
54, Kàu I ê pún hiuⁿ, tī in ê hōetn̂g kàsī in; tìkàu in gôngngia̍h kóng, Chitê lâng tùi tóūi tit tio̍h chitê tìhūi, kap chiahê koânlêng ah?
55, Chitê kiám m̄ sī ba̍kchhiūⁿ ê kiáⁿ mah? I ê lāubú kiám m̄ sī kiò chò Málīa, I ê hiaⁿtī Ngákok, Ioksek, Sebûn, Iûtāi mah?
56, I ê chíbē kiám bô lóng kap lán tī chia mah? Ánne chitê lâng tùi tóūi tit tio̍h chiahê itchhè ah?
57, In chiū iàmchiān I. Tānsī Iâso͘ kā in kóng, Sianti lâng tī pún hiuⁿ pún ke ígōa, bô m̄ chunkùi.
58, Iâso͘ tī hia bô kiâⁿ chē chē koânlêng, inūi in bô sìn I.