《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第十二章

作者 巴克禮普世版小組 2015.07.12

Īⁿsiōng kah Khésī
1 Suijiân bô līek, góa ittēng tio̍h khoakháu. Góa beh kóngkhí Chú hō͘ góa ê īⁿsiōng kah khésī. 2 Góa chai ū chi̍tê Kitoktô͘, cha̍psì nî chêng hō͘ Chú tòa kàu tē saⁿchàn thiⁿ. Góa m̄ chai i ê sengkhu ū chiūⁿkhì á sī kantaⁿ khòaⁿkìⁿ īⁿsiōng. Chíū SiōngChú chai. 3 Góa koh kóng chi̍tpái, chitê lâng hông chhōa khìkàu Lo̍khn̂g. I sī sengkhu siūchiap chiūⁿkhì á sī kantaⁿ khòaⁿkìⁿ īⁿsiōng. Góa m̄ chai, chíū SiōngChú chai. 4 Tī Lo̍khn̂g, i thiaⁿ tio̍h bē titthang kóng ê ōe, chiūsī lâng só͘ m̄ thang kóng ê tāichì. 5 Góa beh ūi tio̍h chitê lâng lâi khoakháu, m̄ koh góa ê loánjio̍k ígōa, góa bē ūi tio̍h kakī khoakháu. 6 Kîsi̍t góa nā beh khoakháu, mā bô sǹgsī khongkhám, inūi góa beh kóng ê sī sūsi̍t, m̄ koh góa kakī ioksok, chiah bián hō͘ lâng tùi góa ê phoephêng chhiaukòe i só͘ khòaⁿ tio̍h kah só͘ thiaⁿ tio̍h.ê. 7 Ūi tio̍h beh hō͘ góa bē inūi tit tio̍h chinchē te̍kpia̍t ê khésī lâi kòethâu kiaungō͘, tī góa ê sengkhu ū chi̍tki chhì, chhinchhiūⁿ Sattàn ê sùchiá lâi kā góa phah, biántit góa kòethâu kiaungō͘. 8 Ūi tio̍h chithāng tāichì, góa bat saⁿpái khúnkiû Chú, hō͘ hitki chhì līkhui góa. 9 SiōngChú ìnkóng, "Góa ê untián kàugia̍h lí ēng, inūi lí loánjio̍k ê sî, Góa ê khùila̍t ē tàng oânchoân hoathui." Só͘í góa chin hoaⁿhí, khah ài khoakháu góa chiahê loánjio̍k, hō͘ Kitok ê khùila̍t tiàm tī góa ê sinchiūⁿ. 10 Ūi tio̍h Kitok ê iânkò͘, góa hoaⁿhí jímsiū loánjio̍k, bújio̍k, pekhāi, khùnkhó͘, inūi góa loánjio̍k ê sî, tiantò ū khùila̍t.


11 Pólô Koansim Kolîmto Kàuhōe Góa itti̍t chiâⁿchò gōnglâng, sī lín kā góa pek ê, inūi góa engkai hō͘ lín oló chiah tio̍h. Góa suijiân bô símmi̍h liáuputkhí, si̍tchāi mā bô khahsu hiahê te̍kpia̍t ê "sùtô͘". 12 Góa tī lín tiongkan ū ēng chióngchióng ê jímnāi lâi kiâⁿ sînjiah, kîsū kah koânlêng, chèngbêng góa sī sùtô͘. 13 Tûliáu góa bô mâhoân lín pangchō͘ góa ígōa, góa tùithāi lín ū tó chi̍thāng pí kîtha ê kàuhōe khah bô kàugia̍h? Chhiáⁿ lín goânliōng góa chiahni̍h "bô kongtō". 14 Taⁿ góa tē saⁿ pái chúnpī beh khì lín hia, góa bē chiâⁿchò lín ê hūtam, góa tùi lín bô símmi̍h iaukiû. Góa só͘ ìài ê sī lín, m̄ sī lín ê kimchîⁿ. Kîsi̍t kiáⁿjî bô engkai ūi tio̍h pē bú chekchū, engkai sī pē bú kā kiáⁿjî chekchū châibu̍t. 15 Góa chin hoaⁿhí hùchhut itchhè lâi pangchō͘ lín, sīmchì hùchhut góa kakī ê sèⁿmiā. Kám kóng góa jú thiàⁿ lín, tit tio̍h lín ê thiàⁿ jú chió? 16 Ánne lín tio̍h sêngjīn góa m̄ bat kā lín thoalūi, m̄ koh ūlâng kóng góa kîkhiáu, ēng khúikhiat ê pō͘sò͘ lâi kā lín hāmhāi. 17 Góa kám ū phài siáⁿlâng khì kā lín phiⁿ? 18 Góa ū khǹg Thêto khì lín hia, mā chhephài chi̍tê hiaⁿtī kah i chòhóe khì. Thêto kám bat kā lín phiⁿ? Goán kám m̄ sī kāng chi̍tê simsîn teh chò? kāng chi̍tê khapō͘ teh kiâⁿ? 19 Lín itti̍t siūⁿkóng goán tùi lín teh ūi kakī piānkái. Kîsi̍t m̄ sī! Goán tī SiōngChú ê bīnchêng kóng Kitok ài goán kóng ê ōe. Chhinài ê hiaⁿtī chímōe ah, goán só͘ chò ê itchhè lóng sī ūi tio̍h beh kā lín chōchiū. 20 Góa khióngkiaⁿ khì lín hia ê sî, kiámchhái khòaⁿkìⁿ lín kah góa só͘ kîthāi ê bô kāngkhoán, lín khòaⁿkìⁿ góa kah lín só͘ kîthāi ê mā bô kāngkhoán. Khióngkiaⁿ lín ū huncheng, oàntò͘, siūkhì, kiattóng, húipòng, kóng khachiahāuōe, phònghong, hunloān. 21 Mā khióngkiaⁿ góa āupiàn koh khì lín hia ê sî, góa ê SiōngChú hō͘ góa tī lín ê bīnchêng kiànsiàu, góa ē ūi tio̍h chinchē lâng thîkhàu, inūi in tùi íchêng só͘ hoān ê chōe, ùòe, kanîm kah hòngtōng, kàu taⁿ iáubōe hóekái.