《巴克禮普世版聖經（試讀本）》

 | | | 轉寄

巴克禮普世版（試讀本） 腓立比書第一章

作者 巴克禮普世版小組 2015.10.18

1 Góa Pólô kah Thêmô͘thài sī Kitok Iâso͘ ê lô͘po̍k, goán siá phoe hō͘ tòa tī Huili̍ppí hiahê kah Kitok Iâso͘ kiatliân ê só͘ū sìntô͘, íki̍p kàuhōe ê kàmtok kah chipsū. 2 Goān lán ê ThiⁿPē SiōngChú kah Chú Iâso͘ Kitok siúⁿsù lín untián kah pêngan!

Pólô Ūi Huili̍ppí ê Sìntô͘ Kîtó
3 Góa ta̍kpái siūⁿ tio̍h lín ê sî, chiū kámsiā góa ê SiōngChú. 4 Ta̍kpái ūi tio̍h lín tāike kîtó ê sî, lóng ēng hoaⁿhí ê sim kîtó, 5 inūi lín tùi thâu chi̍tji̍t kàu taⁿ, lóng chòhóe chhamú soaniông hokim ê kangchok. 6 Góa chhimsìn Hitūi khaisí tī lín tiongkan chò bíhó kangchok ê SiōngChú, ē tī Iâso͘ Kitok chàilîm ê ji̍t kā i oânsêng. 7 Góa siôngsiông teh siàuliām lín, tùi lín chènglâng ū chitkhoán ê kámchêng sī chin tongjiân ê tāichì, inūi bôlūn góa tī kaⁿga̍klāi á sī ūi tio̍h hokim teh piānhō͘ kah chòchèng ê sî, lín lóng ū kah góa hunhióng SiōngChú ê untián. 8 Góa ēng Kitok Iâso͘ ê thiàⁿsim jōani̍h'á siàuliām lín tāike, SiōngChú ē tàng kā góa chòchèng. 9 Góa só͘ kîkiû ê chiūsī: hō͘ lín ê thiàⁿsim ē ná kethiⁿ, lín ê tìhūi kah tùi ta̍kchióng tāichì ê phòaⁿtoànle̍k mā ē ná chìnpō͘; 10 hō͘ lín ē hiáu hunpia̍t hitê siōng hó ê tāichì, ánne tī Kitok chàilîm ê ji̍t, lín chiah ē chiâⁿchò sûnchoân kah bô thang hiâm ê lâng. 11 Lín ê sengoa̍h chiū ē thongkòe Iâso͘ Kitok lâi kiat hó tekhēng ê kóechí, thang chiong êngkng kah oló kui hō͘ SiōngChú.

Ūi tio̍h Kitok Lâi Oa̍h
12 Hiaⁿtī chímōe ah, góa ái lín chai, góa só͘ tú tio̍h ê tāichì tiantò hō͘ hokim kohkhah chìntián. 13 Kiatkó, ôngkiong ê kéngōe choânthé kah tī chia só͘ū ê lâng lóng chai, góa ê koaiⁿkaⁿ sī ūi tio̍h Kitok ê iânkò͘. 14 Chinchē hiaⁿtī chímōe inūi góa ê koaiⁿkaⁿ, tùi Chú kohkhah chhimsìn, kohkhah hótáⁿ bô kiaⁿhiâⁿ lâi thoân SiōngChú ê sìnsit. 15 Sūsi̍tsiōng, ūlâng thoân Kitok ê hokim, sī chhuttī oàntò͘ kah ài oanke ê simlí, ūlâng sī chhuttī sêngì. 16 Sêngì ê lâng sī chhuttī thiàⁿsim, inūi in chai, SiōngChú kauthok góa lâi ūi tio̍h hokim piānhō͘. 17 Hiahê oàntò͘ kah ài oanke ê lâng teh soaniông Kitok sī chhuttī iásim, tōngki bô tansûn. In siūⁿ beh thàn góa koaiⁿkaⁿ ê sî kethiⁿ góa ê kankhó͘. 18 Ánne ū símmi̍h koanhē? Putkoán in sī kéì á sī chinsim, bôlūn ánchóaⁿ, hoâiⁿti̍t Kitok ê hokim thoânkhui, góa chiū hoaⁿhí, mā beh kèsio̍k hoaⁿhí. 19 Inūi góa chai, chitê tāichì ū lín ê kîtó kah Iâso͘ Kitok ê SèngSîn ê pangchō͘, góa ittēng ē tit tio̍h tháupàng, hôeho̍k chūiû. 20 Góa pekchhiat kîthāi kah ǹgbāng ê, chiūsī bô chi̍thāng tāichì ē hō͘ góa kiànsiàu, tiantò góa sîkhek ū kàugia̍h ê ióngkhì, iûkîsī chitmá, putkoán sī sí á sī oa̍h, thang hō͘ Kitok ē tàng thongkòe góa chitê lâng lâi tit tio̍h êngiāu. 21 Inūi tùi góa lâi kóng, oa̍h sī ūi tio̍h Kitok, sí mā ū khahtōa ê līek. 22 Nāsī oa̍h teh ē tàng chò khahchē ū līek ê kangchok, góa soah m̄ chai tio̍h kéng tó chi̍ttiâu lō͘. 23 Góa chitmá chìnthè liónglân, góa si̍tchāi chin ài khì kah Kitok chòhóe, ánne engkai sī khah hó. 24 M̄ koh ūi tio̍h lín ê iânkò͘, góa kohkhah engkai oa̍h lo̍hkhì. 25 Tùi chittiám lâi kóng, góa khaksìn, góa chai góa beh kah lín tāike chòhóe oa̍h lo̍hkhì, sī beh hō͘ lín ê sìngióng kohkhah chìnpō͘, kohkhah hoaⁿhí. 26 Ánne, góa kohchài khì lín hia ê sî, hō͘ lín ū kohkhah chhionghun ê líiû, ūi tio̍h góa ê iânkò͘ lâi ēng Kitok Iâso͘ chò lín ê khoakháu. 27 Bôlūn ánchóaⁿ, siōng tiōngiàu ê sī: lín ê kiâⁿta̍h hûha̍p Kitok hokim ê iaukiû. Ánne, bôlūn góa ē tàng khì kah lin kìⁿbīn ábē, lóng ē tàng thiaⁿ tio̍h lín ê tāichì, chaiiáⁿ lín ūi tio̍h só͘ sìn ê hokim, ēng kāng chi̍tê simchì khiāchāi, tângsim hia̍ple̍k, chòhóe phahpiàⁿ. 28 Bôlūn chò símmi̍h tāichì, bô hō͘ tùite̍k phahkiaⁿ, ánne thang chèngbêng in ē sitpāi lín ē teksèng. Chitê teksèng lóng sī SiōngChú ê chokûi. 29 Inūi SiōngChú m̄ nā siúⁿsù lín te̍kpia̍t ê untián thang sìnkhò Kitok, mā hō͘ lín ūi tio̍h Kitok lâi siūkhó͘, 30 lâi kah góa chòhóe chengchiàn, lín khòaⁿkòe góa ánchóaⁿ chiàntàu, chitmá lín koh thiaⁿ tio̍h góa iáuteh chiàntàu.