《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第16章

作者 巴克禮普世版小組 2011.07.17

1, Hoatlīsài kap Satthó͘kaiphài ê lâng lâi chhì Iâso͘, Chhiáⁿ I ēng tùi thiⁿ ê sînjiah hō͘ in khòaⁿ.
2, Tānsī I ìn kóng, Êhng sî lín kóng, Ōe hó thiⁿ à, inūi thiⁿsek âng.
3, Ia̍h chákhí sî lín kóng, Kin'áji̍t ū honghō͘, inūi thiⁿsek o͘'áu. Lín ē hiáu hunpiat thiⁿsek, chíū bē hunpiat chiahê sî ê sînjiah.
4, Okto̍k kanîm ê sètāi kiû sînjiah; chíū Iokná ê sînjiah ígōa, bô boeh sînjiah hō͘ i. Chiū līpia̍t in khì.
5, Bûntô͘ kèkhì hit pêng, bē kìtit tòa piáⁿ.
6, Iâso͘ kā in kóng, Tio̍h kínsīn tîhông Hoatlīsài kap Satthó͘kaiphài ê lâng ê kàⁿ.
7, Bûntô͘ saⁿkap gīlūn kóng, Sī lán bô tòa piáⁿ o͘h.
8, Iâso͘ chai, chiū kóng, Siósìn ê lâng ah, siáⁿsū inūi bô piáⁿ saⁿkap gīlūn ah?
9, Lín iáukú bē hiáutit, iā bē kìtit gō͘chheng lâng chia̍h gō͘ ê piáⁿ, lín khioh kúi kheng ah?
10, Ia̍h sìchheng lâng chia̍h chhit ê piáⁿ, lín khioh kúi nâ ah?
11, Lín cháiⁿiūⁿ bē hiáutit góa só͘ kā lín kóng ê, m̄ sī chí piáⁿ, chíū tio̍h tîhông Hoatlīsài kap Satthó͘kaiphài ê lâng ê kàⁿ.
12, In chiah ē hiáutit I só͘ kóng ê m̄ sī tîhông piáⁿ ê kàⁿ, chiūsī Hoatlīsài kap Satthó͘kaiphài ê lâng ê kàu.
13, Iâso͘ íkeng kàu Kaisatlīa Huili̍ppí ê kéngkài, mn̄g I ê bûntô͘ kóng, Lâng teh kóng Jînchú sī siáⁿlâng?
14, In kóng, Ūê kóng sī siséchiá Iokhān; ūê kóng sī Ílīa; koh ūê kóng sī Iâlībí, á sī sianti lâng ê chi̍tê.
15, I chiū kā in kóng, Tānsī lín kóng góa sī siáⁿlâng?
16, Sebûn Pítek ìn kóng, Lí sī Kitok, chinoa̍h Siōngchú ê Kiáⁿ.
17, Iâso͘ ìn i kóng, Sebûn, PaIokná, lí ū hokkhì ah; inūi hiatkhì jio̍kthé ê bô chísī lí, chiūsī góa tī thiⁿténg ê Pē chísī lí.
18, Góa koh kā lí kóng, Lí chiūsī Pítek, tī chitê chio̍hpôaⁿ téng góa boeh khíchō góa ê kàuhōe, imhú ê koanài iā bē iâⁿ i.
19, Góa boeh ēng Thiankok ê sósî hō͘ lí; kìⁿnā lí tī tē ni̍h pa̍k ê, tī thiⁿténg iā boeh pa̍k i; kìⁿnā lí tī tē ni̍h pàng ê, tī thiⁿténg iā boeh pàng i.
20, Hit sî chiū kìmkài bûntô͘, bo̍htit kā lâng kóng I sī Kitok.
21, Tùi hit tia̍p khí, Iâso͘ chiah chísī I ê bûntô͘ chai I tio̍h khì Iâlō͘satléng, tùi chiahê tiúⁿló, chèsithâu, kengha̍kkàusu siū tio̍h chē chē khó͘chhó͘; koh siū hāisí, tē saⁿ ji̍t kohoa̍h.
22, Pítek khan I, chekpī I kóng, Chú ah, chhianbān m̄ thang, chitê choa̍ttùi bô boeh kàu tī lí.
23, Iâso͘ oa̍ttńgsin, kā Pítek kóng, Sattàn, thèkhì góa ê āubīn; lí sī góa ê thatgāi; inūi lí só͘ siūⁿ m̄ sī Siōngchú ê sū, sī lâng ê sū.
24, Hit sî Iâso͘ kā I ê bûntô͘ kóng, Lâng nā ài tè góa tio̍h khòaⁿbô kakī, giâ i ê si̍pjīkè, lâi tòe góa.
25, Inūi kìⁿnā ài kiù i ê sìⁿmiā ê, boeh sitlo̍h i; kìⁿnā ūi tio̍h góa lâi sitlo̍h i ê sìⁿmiā ê, boeh tit tio̍h i.
26, Lâng nā tit tio̍h choân sèkài, lâi sòngsit i ê sìⁿmiā, ū símmi̍h līek? á sī lâng boeh chhut símmi̍h lâi tùiōaⁿ i ê sìⁿmiā.
27, Inūi Jînchú ēng I ê Pē ê êngkng, kap I ê thiⁿsài boeh lâi, hit sî boeh chiàu ta̍k lâng ê só͘ kiâⁿ lâi pòèng.
28 Góa si̍tchāi kā lín kóng, Khiā tī chia ê, ū lâng iáubē sí, ē khòaⁿ tio̍h Jînchú tī I ê kok lâi.