《巴克禮普世版聖經（試讀本）》

 | | | 轉寄

巴克禮普世版（試讀本） 提摩太前書第五章

作者 巴克禮普世版小組 2016.03.06

Tùi Sìntô͘ ê Chekjīm
1 M̄ thang chekpī lāu lâng, tio̍h chhinchhiūⁿ khó͘khǹg lāupē ánne kā i khoànbián. Tùi siàuliânlâng khoànbián mā tio̍h chhinchhiūⁿ khó͘khǹg kakī ê hiaⁿtī. 2 Tùithāi lāu hūjînlâng tio̍h chhinchhiūⁿ teh tùithāi kakī ê lāubú. Tio̍h ēng oânchoân sûnkiat ê sim tùithāi siàuliân hūjînlâng ná chhinchhiūⁿ teh tùithāi kakī ê chímōe. 3 Tio̍h chunkèng chinchiàⁿ teh chiúkóaⁿ ê hūjînlâng. 4 M̄ koh chò kóaⁿhū ê kiáⁿjîsun tio̍h seng o̍h tī kakī ê katêng hàusūn sītōa, inūi che sī SiōngChú só͘ hoaⁿhí.ê. 5 Chinchiàⁿ bôi bôóa ê kóaⁿhū chíū ǹgbāng SiōngChú, mêji̍t kèsio̍k khúnkiû kîtó. 6 M̄ koh chhiahoa ê kóaⁿhū suijiân teh oa̍h, kîsi̍t simlêng íkeng síkhì. 7 Lí tio̍h chiong chiahê tāichì kā in kàsī chiah bián hō͘ in siū lâng phoephêng. 8 Lâng nā bô chiàukò͘ chhinlâng, sīmchì bô chiàukò͘ kakī ê katêng, chiūsī ûipōe sìngióng, pí bô sìn ê lâng kohkhah hāi. 9 Kóaⁿhū ittēng tio̍h chhiaukòe la̍kcha̍p hòe chiah thang tengkì, koh tio̍h kantaⁿ kiathun chi̍tpái, 10 mā tio̍h ū hó hêngûi ê chèngkì, chhinchhiūⁿ ióngchhī kiáⁿjî, chiapthāi chhutgōalâng, kā sìntô͘ sékha, chínchè tú tio̍h hoānlān ê lâng, choansim chò hósū, téngténg. 11 M̄ koh siàuliân ê kóaⁿhū m̄ thang kā i tengkì, inūi in chêngio̍k chi̍tē chhiongtōng chiū ē khìsak Kitok siūⁿbeh koh kè, 12 lâi ûipōe khíthâu ê sègoān, tìsú kakī siū tēngchōe. 13 Jîchhiáⁿ in koh o̍h pîntōaⁿ, kòeke kòehō͘ khì chhitthô. M̄ nā pîntōaⁿ, mā chin kāuōe, ài chhap êng'ásū, kóng chi̍tkóa bô engkai kóng ê ōe. 14 Só͘í góa ài siàuliân ê kóaⁿhū koh kè, seⁿ kiáⁿ, liāulí katêng, chiah bē hō͘ tùite̍k ū kihōe lâi kóng lán ê pháiⁿōe. 15 Inūi íkeng ū chi̍tkóa hoanthâu khì tòe Sattàn. 16 M̄ koh sìn Chú ê hūjînlâng chhùlāi nāū kóaⁿhū, tio̍h kā i pangchō͘, m̄ thang chiong chitê tàⁿ sak hō͘ kàuhōe, hō͘ kàuhōe thang pangchō͘ hiahê chinchiàⁿ bôi bôóa ê kóaⁿhū. 17 Gâu tīlí kàuhōe ê tiúⁿló tio̍h kapōe kā i chunkèng. Hiahê te̍kpia̍t chīnla̍t káng tōlí teh kàsī ê tiúⁿló kohkhah tio̍h ánne. 18 Inūi Sèngkeng kóng, "Teh thoa chio̍hbō ê gû, m̄ thang kā i kòa gûchhùilam."( chù: SBK 25:4) Koh kóng, "Kanglâng engkai tit tio̍h kangchîⁿ."( chù: Lk 10:7) 19 Tùi tiúⁿló ê khòngkò nā m̄ sī ū nn̄gê á sī saⁿê chèngjîn, chiū m̄ thang siūlí. 20 Hoānchōe ê lâng tio̍h tòa chènglâng ê bīnchêng kā i chekpī, thang hō͘ kîtha ê lâng mā tit tio̍h kéngkài. 21 Góa tī SiōngChú kah Kitok Iâso͘ íki̍p siū kéngsoán ê thiⁿsài bīnchêng bēnglēng lí, tio̍h chunsiú chiahê chísī, m̄ thang ū phiankiàn, chò tāichì m̄ thang suphian. 22 M̄ thang sûipiān kā lâng kiâⁿ hōaⁿchhiúlé, mā m̄ thang chhamú pa̍tlâng ê hoānchōe, tio̍h kò͘siú kakī ê sûnkiat. 23 Inūi lí ê ūitn̂g bô hó koh kāupēⁿ, m̄ thang kantaⁿ lim chúi, mā tio̍h lim tāmpo̍h'á chiú. 24 Ūkóa lâng ê chōe chin bênghián, iáubōe símphòaⁿ chiū chin chhengchhó, ūê lâng ê chōe kàu āulâi chiah lō͘hiān. 25 Chhinchhiūⁿ ánne, hó hêngûi mā chin bênghián, hiahê bô bênghián ê mā khàm bē tiâu.