《巴克禮普世版聖經（試讀本）》

 | | | 轉寄

巴克禮普世版（試讀本） 約翰一書第一章

作者 巴克禮普世版小組 2016.11.14

Oa̍hmiā ê Tō
1 Goán beh lâi siá koanhē oa̍hmiā ê Tō kā lín soatbêng. Chitê Tō tùi goânkhíthâu to̍h chûnchāi. Goán ū thiaⁿ tio̍h, chhinba̍k khòaⁿ tio̍h, ū siôngsè koankhòaⁿ, mā ū chhinchhiú bong tio̍h. 2 Chitê oa̍hmiā íkeng chhuthiān, goán ū khòaⁿ tio̍h, chitmá lâi chò kiànchèng, mā pò lín chai hitê éngoán ê oa̍hmiā púnlâi to̍h kah ThiⁿPē tôngchāi, taⁿ tùi goán hiánhiān. 3 Goán chiong só͘ khòaⁿ tio̍h kah só͘ thiaⁿ tio̍h ê thoânpò hō͘ lín chai, thang hō͘ lín kah goán ū thoânkhè ê koanhē. Chitê thoânkhè sī goán kah ThiⁿPē íki̍p I ê Kiáⁿ Iâso͘ Kitok tiongkan ê thoânkhè. 4 Goán siá chiahê tāichì hō͘ lín, sī beh hō͘ lán tāike chhiongmóa hílo̍k.

SiōngChú sī Kng
5 Taⁿ goán chiong tùi SiōngChú ê Kiáⁿ thiaⁿ tio̍h ê ōe thoân hō͘ lín ê sìnsit sī ánne: SiōngChú sī kng, tī I oânchoân bô o͘àm. 6 Lán nā kóng lán kah SiōngChú ū thoânkhè koanhē, iáukoh kèsio̍k tī o͘àmtiong sengoa̍h, sī teh kóng pe̍hchha̍t, bô chiàu chinlí teh kiâⁿ. 7 M̄ koh lán nā tī kngbêngtiong sengoa̍h, chhinchhiūⁿ SiōngChú tī kngbêngtiong, lán chiū hō͘siōng ū thoânkhè koanhē, I ê Kiáⁿ Iâso͘ ê hoeh mā ē kèsio̍k sétû lán itchhè ê chōe. 8 Lán nā kóng kakī bô chōe, sī teh khiphiàn kakī, lán ê simlāi bô chinlí. 9 Lán nā sêngjīn lán ê chōe, SiōngChú sī chinsi̍t koh konggī, I ē siàbián lán ê chōe, sétû lán itchhè ê putgī. 10 Lán nā kóng m̄ bat hoānchōe, sī kā SiōngChú khòaⁿchò kóng pe̍hchha̍t, I ê tōlí bô tī lán ê simlāi.