《押韻啟應詩篇》

 | | | 轉寄

台語押韻啟應詩篇 31

作者 Tīⁿ Jîgio̍k　 鄭兒玉　編著 2006.08.06

Tāupi̍t ê si; kau hō͘ Ga̍kkoaⁿ.

1a　Iâhôhoa ah, góa óakhò Lí teh oa̍h,
　　耶 和 華　啊，我　倚　靠　ＬＩ２在　活，
1b　　　Kiû Lí hō͘ góa éngéng bô kiànsiàu ū i óa .
　　　　求　Ｌｉ２ 使　我　永 永　無　見 誚　有 依 倚。

(齊聲)　CHIÀU LÍ Ê KONGGĪ CHÍⁿKIÙ GÓA.
　　　　照　Ｌｉ２的 公　義　拯　救　我。


2a　Kiû Lí àⁿ hīkhang thiaⁿ góa, kínkín lâi kiù góa;
　　求　Ｌｉ２俯 耳 孔 聽 我， 緊 緊 來 救 我；
2b　　　Chòe góa kiankò͘ ê chio̍hpôaⁿ, chòe ōesó͘ chínkiù góa.
　　　　做 我 堅 固 的 石 磐 ， 做 衛 所 拯 救 我。


3a　Inūi Lí sī góa ê soaⁿgiâm, góa ê soaⁿchē teh póhō͘ góa.
　　因 為Ｌｉ２是 我 的 山 巖 ， 我 的 山 寨 在 保 護 我。
3b　　　Só͘í kiû Lí inūi Lí ê miâ lâi ínchhōa góa, chítiám góa.
　　　　所以 求　Ｌｉ２因 為Ｌｉ２的 名 來 引 導 我， 指 點 我。


4a　Lâng àmchīⁿ tiuⁿ lôbāng beh bāng góa hō͘ sí ,
　　人 暗 靜 張 羅 網 要 網 我 使 死，
4b　　　Kiû Lí kiù góa thoatlī ; Inūi Lí sī góa ê ōesó͘ thang siámpī .
　　　　求 　Ｌｉ２救 我 脫 離; 因 為Ｌｉ２是 我 的 衛 所 通 閃 避


5a　Góa chiong góa ê lênghûn kau tī Lí ê chhiú;
　　我 將 我 的 靈 魂 交 在Ｌｉ２的 手；
5b　　　Iâhôhoa chinsi̍t ê Siōngtè ah , Lí ū kiùsio̍k góa lâi chínkiù.
　　　　耶 和 華 真 實 的 上 帝 啊，Ｌｉ２有救 贖 我 來 拯 救。


6a　Góa oànhūn hiahê sìnhōng huké ê lâng;
　　我 怨 恨 那 些 信 奉 虛 假 的 人；
6b　　　To̍kto̍k góa óakhò Iâhôhoa bô làng.
　　　　獨 獨 我 倚 靠 耶 和 華 無 閬。


7a　Góa inūi Lí ê chûài beh hoaⁿhí khoàilo̍k bô hān,
　　我 因 為Ｌｉ２的 慈 愛 要 歡 喜 快 樂 無 限，
7b　　　Inūi Lí ū khòaⁿkìⁿ góa ê kankhó͘ lo̍hlān,
　　　　因 為Ｌｉ２有 看 見 我 的 艱 苦 落 難，
　　　　chai góa simsîn ê kanlân.
　　　　知 我 心 神 的 艱 難。


8a　Lí bē bat chiong góa kau tī tùite̍k ê chhiú siū hāi,
　　Ｌｉ２未 曾 將 我 交 在 對 敵 的 手 受 害，
8b　　　Lí hō͘ góa ê kha khiā tī khuikhoah ê só͘chāi.
　　　　Ｌｉ２使 我 的 腳 立 在 開 闊 的 所 在 。


9a　Iâhôhoa ah, góa tī hoānlān tiong,
　　耶 和 華 啊，我 在 患 難 中 ，
9b　　　Kiû Lí lînbín góa ê khó͘tiong.
　　　　求　Ｌｉ２憐 憫 我 的 苦 衷 。


9c　Góa ê ba̍kchiu inūi iubūn phahpháiⁿ,
　　我 的 目 珠 因 為 憂 悶 打 壞，
9d　　　Góa ê simsîn, góa ê sinthé, ia̍h sī ánni ti̍tti̍t bái.
　　　　我 的 心 神， 我 的 身 體，亦 是 按 呢 直 直 壞。


10a　Góa ê sìⁿmiā inūi iukhó͘ lâi siaubôkhì.
　　我 的 性 命 因 為 憂 苦 來 消 無 去。
10b　　　Góa ê nîhè ūi tio̍h thó͘khùi ia̍h ánni ;
　　　　我 的 年 歲 為 著 嘆 氣 亦 按 呢；


10c　Góa ê khùila̍t inūi góa ê chōeok lâi soelám;
　　我 的 氣 力 因 為 我 的 罪 惡 來 衰 弱；
10d　　　Góa ê kutthâu ia̍h ko͘tâ amcham.
　　　　我 的 骨 頭 亦 枯 乾 腌 慘 。


11a　Góa inūi góa itchhè ê tùite̍k, chiâⁿchòe lêngjio̍k;
　　我 因 為 我 一 切 的 對 敵，成 做 凌 辱；
11b　　　Tī góa ê chhùpiⁿtau koh khah siongtiōng siū bújio̍k;
　　　　在 我 的 厝 邊 兜 又 較 傷 重 受 侮 辱；


11c　Hiahê bat góa ê lâng lóng kiaⁿ góa;
　　那 些 識 我 的 人 攏 驚 我；
11d　　　Tī gōabīn khòaⁿkìⁿ góa ê lâng cháusiám līkhui góa.
　　　　在 外 面 看 見 我 的 人 走 閃 離 開 我。


12a　Góa chhinchhiūⁿ sílâng hō͘ lâng bōe kìtit kìliām,
　　我 親 像 死 人 讓 人 未 記 得 紀 念，
　　bô lâng teh siàuliām;
　　無 人 在 思 念；
12b　　　Góa chhinchhiūⁿ phòachhùi ê khìkū chhùiiâmiâm.
　　　　我 親 像 破 碎 的 器 具 碎 奄 奄。


13a　Inūi góa thiaⁿkìⁿ chōechōe lâng ê húipòng,
　　因 為 我 聽 見 多 多 人 的 毀 謗，
13b　　　Sì ûi lóng ū uihia̍p teh kóng.
　　　　四 圍 攏 有 威 脅 在 講。


13c　In saⁿkap chhamsiông kongkek góa ê sî ,
　　伊 相 與 參 詳 攻 擊 我 的 時，
13d　　　Chiū kèbô͘ beh hāi góa ê sìⁿmiā hō͘ sí .
　　　　就 計 謀 要 害 我 的 性 命 使 死。


14a　Iâhôhoa ah , góa iûgoân óakhò Lí bô thè.
　　耶 和 華 啊，我 猶 原 倚 靠　Ｌｉ２無 退。
14b　　　Góa kóng, Lí sī góa ê Siōngtè .
　　　　我 講，　Ｌｉ２是 我 的 上 帝。


15a　Góa ê chogū tī Lí ê chhiú;
　　我 的 遭 遇 在　Ｌｉ２的 手 ；
15b　　　Kiû Lí kiù góa thoatlī góa ê tùite̍k ê chhiú,
　　　　求　Ｌｉ２救 我 脫 離 我 的 對 敵 的 手，
　　　　í ki̍p khúnpek góa ê lâng ê ín iú .
　　　　以 及 逼 迫 我 的 人 的 引 誘。


16a　Kiû Lí hō͘ Lí ê bīn chiò kng Lí ê lô͘po̍k;
　　求　ＬＩ２使 　Ｌｉ２的 面 照 光　Ｌｉ２的 奴 僕；
16b　　　Chiàu Lí ê chûài chínkiù góa ê ioksok.
　　　　照　Ｌｉ２的 慈 愛 拯 救 我 的 約 束。


17a　Iâhôhoa ah, kiû Lí hō͘ góa bô kiànsiàu;
　　耶 和 華 啊，求　Ｌｉ２使 我 無 見 誚；
17b　　　Inūi góa ū kiûkiò Lí .
　　　　因 為 我 有 求 叫　Ｌｉ２。


17c　Kiû Lí hō͘ pháiⁿlâng kiànsiàu,
　　求　Ｌｉ２ 使 歹 人 見 誚，
17d　　　Hō͘ in tī imkan chēngchauhchauh teh bih .
　　　　使 伊 在 陰 間 靜 寂 寂 在 匿。


18a　Goān Lí hō͘ hiahê pe̍hchha̍t ê chhùi piàn é káu;
　　願　Ｌｉ２使 那 些 白 賊 的 嘴 變 啞 巴；
18b　　　Chiūsī kiaungō͘ khòaⁿkhin,
　　　　就 是 驕 傲 看 輕，
　　　　lāmsám búbān gīlângê chhùikháu.
　　　　濫 糝 侮 慢 義 人 的 嘴 口。


19a　Kèngùi Lí ê lâng ê chē ūi ,
　　敬 畏Ｌｉ２ 的 人 的 座 位，
19b　　　Lí ūi tio̍h in ū chekchū ê unhūi,
　　　　Ｌｉ２為 著 伊 有 積 聚 的 恩 惠，


19c　Ūi tio̍h óakhò Lí ê lâng hiánbêng,
　　為 著 倚 靠　Ｌｉ２的 人 顯 明，
19d　　　Tī sèkanlâng ê bīnchêng.
　　　　在 世 間 人 的 面 前。


19e　Só͘ si hêng ê unhūi,
　　所 施 行 的 恩 惠，
19f　　　Cháiⁿiūⁿ hiah tōa tui !
　　　　怎 樣 許 大 堆！


20a　Lí beh chiong in khǹg tī Lí ê bīnchêng únba̍t ê só͘chāi;
　　Ｌｉ２　要 將 伊 放 在Ｌｉ２ 的 面 前 隱 密 的 所 在；
20b　　　Biántì tú tio̍h lâng ê kèbô͘ hāmhāi;
　　　　免 致 遇 到 人 的 計 謀 陷 害；


20c　Lí beh àmchīⁿ pósiú in tī tiùⁿûilāi,
　　Ｌｉ２　要 暗 靜 保 守 伊 在 帳 圍 內，
20d　　　Bián siū chhùichi̍h ê chengpiān, hō͘ in bô gāi.
　　　　免 受 嘴 舌 的 爭 辯， 使 伊 無 礙。


21a　Iâhôhoa sī engkai o ló ê chúcháiⁿ.
　　耶 和 華 是 應 該 讚 美 的 主 宰 。
21b　　　Inūi I tī kiankò͘ ê siâⁿ tùi góa sichhut I kîbiāu ê chûài.
　　　　因 為 祂 在 堅 固 的 城 對 我 施 出 祂 奇 妙 的 慈 愛。


22a　Lūnkàu góa, góa bat tio̍hkip kóng khí,
　　論 到 我， 我 曾 著 急 講 起：
22b　　　Tùi Lí ê ba̍kchiuchêng, góa siū kehtn̄g kiaⁿhiâⁿ.
　　　　從　Ｌｉ２ 的 目 珠 前 ， 我 受 隔 斷 驚 惶。


22c　Chóngsī góa kiûkiò Lí ê sî ,
　　總 是 我 求 叫　Ｌｉ２的 時，
22d　　　Lí iûgoân thiaⁿ góa khúnkiû ê siaⁿ.
　　　　Ｌｉ２ 猶 原 聽 我 懇 求 的 聲。


23a　Iâhôhoa sèng ê pehsìⁿ,
　　耶 和 華 聖 的 百 姓，
23b　　　Lín lóng tio̍h thiàⁿ I ;
　　　　恁 攏 當 愛 祂；


23c　Iâhôhoa pósiú sêngsi̍t ê lâng,
　　耶 和 華 保 守 誠 實 的 人，
23d　　　Tāngtāng pòèng kiâⁿ kiaungō͘ ê lâng.
　　　　重 重 報 應 行 驕 傲 的 人。


24a　Kìⁿnā ǹgbāng Iâhôhoa ê lâng,
　　凡 若 盼 望 耶 和 華 的 人，
24b　　　Lín tio̍h chòngtáⁿ, lín ê sim tio̍h kiankò͘ bô làng.
　　　　恁 當 壯 膽， 恁 的 心 當 堅 固 無 閬。