《押韻啟應詩篇》

 | | | 轉寄

台語押韻啟應詩篇 45

作者 Tīⁿ Jîgio̍k 2006.11.19

45　　Khóla̍h hō͘è kàsī ê si, koh sī àibō͘ ê koa, kau hō͘ Ga̍kkoaⁿ, tiāu, sī ēng “Pekha̍phoe.”

1a　Góa ê sim chhèngchhut hó ê ōe ,
　　我 的 心 凊 出 好 的 話，

　　góa kóngkhí góa ūi tio̍h ông só͘ chòe,
　　我 講 起 我 為 著 王 所 做，

1b　　　Góa ê chi̍h sī bínchia̍t ê lâng ê pitoe̍h.
　　　　我 的 舌 是 敏 捷 的 人 的 筆 劃。

2a　Lí pí sèkan lâng khah hókhòaⁿ,
　　你 比 世 間 人 較 好 看，

2b　　　Tī lí ê chhùi ū unhūi móamóa,
　　　　在 你 的 嘴 有 恩 惠 滿 滿，

2c　Só͘ í Siōngtè sùhok teh koankhòaⁿ,
　　所 以 上 帝 賜 福 在 觀 看 ，

2d　　　Ti̍tkàu éngoán bô piànōaⁿ.
　　　　直 到 永 遠 沒 變 換。

3a　Tōa koânlêngê ah , lí tio̍h pē kiàm tī ioni̍h,
　　大 權 能 者 啊，你 當 背 劍 在 腰 裡，

3b　　　Hiánchhut lí ê êngkng kap uigiâm tī sinni̍h.
　　　　顯 出 你 的 榮 光 及 威 嚴 在 身 裡。

4a　Koh tī uigiâm ê sî ,
　　又 在 威 嚴 的 時，

4b　　　Ūi tio̍h chinlí , khiampi , konggī ,
　　　　為 著 真 理、謙 卑、 公 義，

4c　Lí chē chhia chìnchêng khì,
　　你 坐 車 進 前 去，

4d　　　Bô m̄ sènglī ,
　　　　無 不 勝 利，

4e　Lí ê chiàⁿchhiú beh chòe thang kiaⁿ ê tāichì,
　　你 的 右 手 要 做 通 驚 的 代 誌，

4f　　　Thang hō͘ lí khòaⁿkìⁿ.
　　　　通 讓 你 看 見。

5a　Lí ê chìⁿbah chin lāi koh kimkim,
　　你 的 箭 肉 真 利 又 金 金，

　　siā tio̍h ông ê tùite̍k ê sim,
　　射 著 王 的 對 敵 的 心，

5b　　　Lia̍tpang tó tī lí ê ē bīn siong chin chhim.
　　　　列 邦 倒 在 你的 下面 傷 真 深。

6a　Siōngtè siúⁿsù lí ê póchō, sī éngéng bô thêng,
　　上 帝 賞 賜 你 的 寶 座，是 永 永 沒 停，

6b　　　Lí ê kok ê koânpèng sī chèngti̍t ê koânpèng.
　　　　你 的 國 的 權 柄 是 正 直 的 權 柄。

7a　Lí oànhūn puthoat hoaⁿhí konggī ,
　　你 怨 恨 不 法 歡 喜 公 義，

7b　　　Só͘í Siōngtè, lí ê Siōngtè , ēng hoaⁿhí ê iû boah lí ,
　　　　所以 上 帝, 你的 上 帝，用 歡 喜 的 油 抹 你，

　　　　iâⁿkè lí chiahê ôngphōaⁿ bô pí .
　　　　贏 過 你 這 些 王 伴 沒 比。

8a　Lí ê i chiûⁿ lóng ū bu̍tio̍h, tîmhiuⁿ, jio̍kkùi ê phangbī ,
　　你 的 衣 裳 攏 有 沒 藥，沉 香， 肉 桂 的 香 味，

8b　　　Tùi chhiūⁿgê ê ôngkiong, ū sihiân ê ga̍kkhì hō͘ lí hoaⁿhí .
　　　　對 象 牙 的 王 宮， 有 絲 弦 的 樂 器 讓 你 歡 喜。

9a　Ū ông ê chabó͘kiáⁿ tī lí chunkùi hūlú ê tiongkan,
　　有 王 的 查 某 子 在 你 尊 貴 婦 女 的 中 間，

9b　　　Ônghō͘ ēng Gôhui ê kim chngthāⁿ,
　　　　王 后 用 俄 斐 的 金 裝 飾，

　　　　khiā tī lí ê chiàⁿpêng chhéngan .
　　　　站 在 你 的 右 傍 請 安。

10a　Chabó͘gín'á ah, lí tio̍h thiaⁿ,
　　　查 某 囝 子 啊，你 著 聽，

10b　　　Tio̍h àⁿ hīkhang lâi thiaⁿ.
　　　　　著 俯 耳 孔 來 聽。

10c　Tio̍h khòaⁿ i ,
　　　著 看 他，

10d　　　M̄ thang kìtit lí ê pehsìⁿ, kap lāupē ê sinpiⁿ.
　　　　　不 通 記 得 你的 百 姓，和 老 父 的 身 邊。

11a　Ông chiū beh himbō͘ lí ê súi,
　　　王 就 要 欣 慕 你 的 美，

11b　　　In ūi i sī lí ê chú, lí tio̍h kunsûi .
　　　　　因 為 他 是 你 的 主，你 著 跟 隨。

12a　Chhuilô ê pehsìⁿ beh lâi sàng lémi̍h kui tùn,
　　　推 羅 的 百 姓 要 來 送 禮 物 歸 噸，

12b　　　Pehsìⁿtiong ê hógia̍hlâng beh tùi lí kiû un .
　　　　　百 姓 中 的 好 額 人 要 對 你 求 恩。

13a　Ông ê chabó͘kiáⁿ tī ôngkionglāi, ke̍kkî ênghôa,
　　　王 的 查 某 子 在 王 宮 內，極 其 榮 華，

13b　　　I ê i ho̍k só͘ siùê , sī ēng kimsòaⁿ.
　　　　　她 的 衣 服 所 鏽 的，是 用 金 線。

14a　I beh chhēng siùhoe ê i ho̍k, siū chhōa kàu ông ê bīnchêng,
　　　她要 穿 鏽 花 的衣 服，受 導 到 王 的 面 前 ，

14b　　　Chòephōaⁿ kunsûi i ê chāiseklú ū hok,
　　　　　作 伴 跟 隨 她 的 在 室 女 有 福，

　　　　ia̍h beh siū chhōa kàu lí ê bīnchêng,
　　　　　亦 要 受 領 到 你 的 面 前，

15a　In beh hoaⁿhí khoàilo̍k siū ínchhōa,
　　　伊 要 歡 喜 快 樂 受 引 導，

15b　　　In beh chìnji̍p ôngkiong tī hia tòa.
　　　　　伊 要 進 入 王 宮 在 彼 住。

16a　Lí ê kiáⁿsun beh sòachiap lí ê lia̍tchó͘ hengōng,
　　　你 的 子 孫 要 續 接 你 的 列 祖 興 旺，

16b　　　Lí beh siatli̍p in tī choântōe chòe ông.
　　　　　你 要 設 立 伊 在 全 地 作 王。

17a　Góa beh hō͘ lí ê miâ tī bāntāi hō͘ lâng kìliām i ,
　　　我 要 使 你 的 名 在 萬 代 讓 人 記 念 它，

17b　　　Só͘ í bān pehsìⁿ beh éngéng oánoán kámsiā lí .
　　　　　所 以 萬 百 姓 要 永 永 遠 遠 感 謝 你。