《押韻啟應詩篇》

 | | | 轉寄

台語押韻啟應詩篇 66

作者 Tīⁿ Jîgio̍k 2007.04.15

66　　Chi̍tphiⁿ sikoa; kau hō͘ Ga̍kkoaⁿ.

1a　Choântōe lóng tio̍h tùi Siōngtè ,
　　全 地 攏 著 對 上 帝，

1b　　　Lâi chhut hoaⁿhí ê siaⁿ tângchê.
　　　　來 出 歡 喜 的 聲 同 齊。

2a　Chhiùⁿkoa o ló I ê miâ ê êngkng;
　　唱 歌 讚 美 祂 的 名 的 榮 光；

2b　　　Ēng o ló ê ōe lâi hiánbêng I ê êngkng.
　　　　用 讚 美 的 話 來 顯 明 祂 的 榮 光。

3a　Tio̍h tùi Siōngtè kóngbêng,
　　著 對 上 帝 講 明，

3b　　　Lí ê só͘chòe kàu hiah thang kiaⁿ!
　　　　你 的 所 做 到 許 通 驚！

3c　In ūi Lí ê tōa koânlêng,
　　因 為 你 的 大 權 能，

3d　　　Lí ê tùite̍k beh hângho̍k Lí bô siaⁿ.
　　　　你 的 對 敵 欲 降 服 你 無 聲。

4a　Choântōe beh kèngpài Lí , gîmsi o ló Lí ;
　　全 地 要 敬 拜 你， 吟 詩 讚 美 你；

4b　　　Beh gîmsi o ló Lí ê miâ ji̍t kap mî .
　　　　要 吟 詩 讚 美 你 的 名 日 及 暝。

5a　Lín tio̍h lâi ,
　　恁 著 來，

5b　　　Lâi khòaⁿ Siōngtè só͘kiâⁿ ê sū tī tāi tāi,
　　　　來 看 上 帝 所 行 的 事 在 代 代，

5c　I tùi sèkanlâng só͘chòeê ,
　　祂 對 世 間 人 所 做 的，

5d　　　Putchí thang kiaⁿ teh kéngsè .
　　　　不 止 通 驚 在 警 世。

6a　I chiong hái piànchòe ta tōe;
　　祂 將 海 變 做 乾 地；

6b　　　I pō͘kiâⁿ kè hôkhoe; tī hia goán hoaⁿhí , inūi I ê só͘chòe.
　　　　祂步 行 過 河 溪； 在 彼 阮 歡 喜，因為 祂的 所 做。

7a　I ēng I ê koân tī lí ti̍t kàu éngoán;
　　祂 用 祂 的 權 治 理 直 到 永 遠；
　　I ê ba̍kchiu kàmchhat lia̍tpang bô tî oān,
　　祂 的 目 珠 鑒 察 列 邦 無 遲 緩，

7b　　　Pōege̍k ê lâng m̄ thang chūko chūchoan.
　　　　悖 逆 的 人 不 通 自 高 自 專 。

8a　Bān pehsìⁿ ah , lín tio̍h o ló goán ê Siōngtè ;
　　萬 百 姓 啊， 恁 著 讚 美 阮 的 上 帝；

8b　　　Hō͘ lâng thiaⁿkìⁿ o ló I ê siaⁿ tī thiⁿē .
　　　　使 人 聽 見 讚 美 祂 的 聲 在 天 下。

9a　I hō͘ goán ê sìⁿmiā oa̍hteh ū ǹgbāng,
　　祂 使 阮 的 性 命 活 著 有 盼 望 ，

9b　　　Ia̍h bô hō͘ goán ê kha iôtāng. 　　
　　亦 無 使 阮 的 腳 搖 動。

10a　Siōngtè ah , Lí bat chhìgiām goán;
　　　上 帝 啊，你 曾 試 驗 阮；

10b　　　Chhinchhiūⁿ thoànliān gûn chi̍tiūⁿ iā thoànliān goán.
　　　　　親 像 鍛 練 銀 一 樣 也 鍛 練 阮。

11a　Lí hō͘ goán ji̍p lôbāng lâi kíntiuⁿ,
　　　你 使 阮 入 羅 網 來 緊 張，

11b　　　Ēng tāngtàⁿ hē tī goán ê sinchiūⁿ.
　　　　　用 重 擔 放 於 阮 的 身 上。

12a　Lí hō͘ lâng chē chhiabé ,
　　　你 使 人 坐 車 馬，

12b　　　Pôaⁿkè goán ê thâukhak;
　　　　　過 阮 的 頭 殼；

12c　Goán kengkè chúihé .
　　　 阮 經 過 水 火。

12d　　　Chóngsī Lí hō͘ goán kàu pùū ê thó͘tē .
　　　　　總 是 你 使 阮 到 富 有的 土 地。

13a　Góa beh ēng siochè chìnji̍p Lí ê chhù;
　　　我 要 用 燒 祭 進 入 你 的 厝；

13b　　　Góa beh tùi Lí siā góa ê goān kúkú.
　　　　　我 要 對 你 謝 我 的 願 久 久。

14a　Chiūsī tī góa hoānlān ê sî ,
　　　就 是 在 我 患 難 的 時，

14b　　　Góa ê chhùitûn só͘ kóng khí, góa ê chhùi só͘ hē goān ê tāichì .
　　　　　我 的 嘴 唇 所 講 起，我 的 嘴 所 下 願 的 事 情。

15a　Góa beh ēng pûi ê chengsiⁿ ê siochè lâi hiàn hō͘ Lí ,
　　　我 要 用 肥 的 精 牲 的 燒 祭 來 獻 給 你，

15b　　　Kap kangiûⁿ ê phangbī hiàn hō͘ Lí ;
　　　　　及 公 羊 的 芳 味 獻 給 你；
　　　　Koh ēng kang ê gû , kang ê soaⁿiûⁿ, lâi hiàn hō͘ Lí .
　　　　　復 用 公 的 牛，公 的 山 羊，來 獻 給 你。

16a　Hoānnā kèngùi Siōngtè ê lâng, lín lóng tio̍h lâi thiaⁿ;
　　　凡 若 敬 畏 上 帝 的 人， 恁 攏 著 來 聽；

16b　　　Góa beh kóngkhí I ūi góa só͘ kiâⁿ ê sū chi̍tkiāⁿ chi̍tkiāⁿ.
　　　　　我 欲 講 起 祂 為 我 所 行 的 事 一 件 一 件。

17a　Góa bat ēng góa ê chhùi kiûkiò I ;
　　　我 曾 用 我 的 嘴 求 叫 祂；

17b　　　Ēng góa ê chi̍h o ló I chòe koân bû jī .
　　　　　用 我 的 舌 讚 美 祂 做 高 無 二。

18a　Góa nā simlāi chùtiōng chōeok,
　　　 我 若 心 內 注 重 罪 惡，

18b　　　Chú tekkhak bô beh thiaⁿ góa ê kiûthok.
　　　　　主 的 確 無 要 聽 我 的 求 託。

19a　Chóngsī Siōngtè si̍tchāi ū teh thiaⁿ,
　　　總 是 上 帝 實 在 有 在 聽，

19b　　　Í keng àⁿlo̍h thiaⁿ góa kî tó ê siaⁿ.
　　　　　已 經 俯 落 聽 我 祈 禱 的 聲。

20a　Siōngtè sī engkai siū oló ,
　　　上 帝 是 應 該 受 讚美，

20b　　　I bē bat thesî góa ê kî tó ,
　　　　　祂 未 曾 推 辭 我 的 祈 禱，
　　　　ia̍h bē bat hō͘ I ê chûài kā góa phah bô .
　　　　　亦 未 曾 讓 祂 的 慈 愛 給 我 打 無。