《各各他e5目屎--苦難得安慰》

 | | | 轉寄

散赤gín'á ê午餐

作者 紀福讚 2006.06.18

1995年3月11日tī丹麥ê哥本哈根舉行第一屆全球消除散赤ê高峰會議，有148國ê政治領袖帶領一萬外人出席參詳，向望會有解決iau餓ê積極方案。全球有56億ê人口，其中11億ê人口生活tī極度散赤ê環境ni̍h。Tī哥本哈根聯合國發展總署有一座「散赤ê時鐘」，記錄每工收入無到一箍美金ê家庭所出世ê gín'á。Kantaⁿ tī開會ê期間，三日久，全球就有十九萬五千個gín'á，一出世就註定tio̍h tī散赤中生活。

美國由副總統高爾kap第一夫人希拉蕊帶隊參加，答應幫助第三世界ê婦女教育，增加生產技能，m̄ kú諷刺ê是，tī美國本土，共和黨議員tú teh計劃取消散赤gín'á ê減免費午餐ê預算，目的是beh減免富人ê稅金負擔。濟濟取消散赤人ê福利行動中，也包括取消散赤單身ê子女扶養補助，所提出ê理由非常堂皇－－ánni，年輕ê單親才bē胡亂生gín'á。

這kap今á日台灣ê富有商人反對發放年老農民ê福利津貼á是敬老年金kāng款。有錢人榨取社會kap環境ê資源，踏tī散赤人ê頭殼頂koh食koh放，soah m̄甘將in食chhun ê分hō͘散赤人。連執政者也bē見笑講「譬如我做總統，我雖然超過65歲，我無需要敬老年金，所以發放敬老年金是無必要。親像王永慶也無需要。」咱會tàng看見，這是富有ê執政階層bē tàng體會散赤人ê艱苦，尚典型ê寫照kap論調，soah m̄知全台灣kantaⁿ一位總統、一位王永慶，iáu有二千外萬ê人m̄是總統，也m̄是大企業家。台灣濟濟年老ê農民拍拚一世人，流汗流目屎繳稅金，m̄ kú年老破病ê時，kantaⁿ會tàng tī厝內等死，但是富有ê執政者反對ê論調卻是「hō͘散赤人福利，是鼓勵in懶惰」。

耶穌bat講過「富人kap拉撒路」ê譬喻，這tútú是今á日台灣貧富差距過度ê寫照。富人穿紫色袍，食山珍海味，食kah高血壓、心臟病；但是散赤人soah iau kah連基本ê三頓、看病ê氣力都無。富人認為「摃高爾夫」（破壞水土保養）是in運動ê權利，soah認為「散赤gín'á ê午餐」是一種社會資源ê浪費，認為這是散赤人tī in豐盛ê暗頓桌腳teh「iau飽吵」。

今á日，tī美國ê社會，常常會看見富有ê律師駛高貴ê轎車，去富麗堂皇ê法院替「散赤犯人」出庭，主持公義（當然，tio̍h付律師費），這是iáu算bē bái ê富人。Khah淒慘ê是富人出錢hō͘政客競選，立法來限制散赤人擾亂in富有社區ê安寧。富有ê律師、檢察官、法官、執政者作伙計劃將「散赤ê犯人」終身關tī監獄裡，免得in tī桌腳「iau飽吵」，就有人因為kantaⁿ「搶一塊披薩」，tio̍h ài面對25年ê徒刑（到無期徒刑）。富有ê立法者kap執法者，kantaⁿ將問題ê焦點khǹg tī「這個人有搶劫ê前科」，soah漠視「為啥物這個人tio̍h不斷去搶食」ê社會問題。社會散赤問題ê解決，是執政者kap立法者ê責任，m̄ kú今á日，tī美國主流ê社會soah kantaⁿ將這款ê責任khǹg tī散赤人ê身上，控告in無守法，用暴力搶食。事實上，「犯法」是社會問題ê「病症」，m̄是社會問題ê「病因」，beh解決犯罪，m̄是起khah濟監獄就會當解決，是注重chiahê社會問題ê病因，允准散赤人有基本ê生存權利，hō͘ in m̄免搶食，就會tàng有生存ê安全感。

台灣也是kāng款。台灣今á日ê富有財源，若m̄肯轉用tī社會問題ê解決，聽「散赤人iau餓ê聲音」，允准inti7桌á腳拾食chhunê，甚至kap in tī桌頂食飯。若無，chiahê iau餓ê忍耐，早慢會擋bē tiâu，會爆炸。先知阿摩司講：「Lín怨恨tī城門口責備ê人，厭惡hitê講正直話ê人。Lín踐踏散赤人，向in榨取麥á；lín用大石建造房屋，soah bē當tòa tī內面；lín栽種葡萄園，soah bē當lim所出ê酒」（摩五10~11）。彌迦講：「雅各ê首領，以色列家ê官長ah，lín tio̍h聽。Lín m̄知影公平mah？Lín惡善好惡，tùi人ê身上剝皮，tùi人ê骨頭剔肉.... . . . . 拍斷in ê骨頭，下鍋，親像鍋中ê肉」（彌三1－3）。當富有ê執政者無顧念散赤人ê福利，甚至是無顧念in基本ê生存權ê時，是「用人ê血建造錫安，由罪孽起造耶路撒冷。」（三10）