《各各他e5目屎--苦難得安慰》

 | | | 轉寄

該撒kap上帝

作者 紀福讚 2006.06.25

「Lín tio̍h將該撒ê物納hō͘該撒，將上帝ê物納hō͘上帝。」（馬可福音12章17節）耶穌這句話，時常hō͘人引用做「政治kap宗教tio̍h分離」ê根據。事實上，若àn經文ê頂下文，以及斟酌耶穌講話ê習慣，咱會注意耶穌這句話ê重點，是tī第二個部分，「將上帝ê物納hō͘上帝」。啥物是上帝ê物neh？就是chiahê依附外來政權欺壓散赤同胞ê「猶奸」－－藉問話beh陷害耶穌ê希律黨kap宗教領袖（知識份子）本身。耶穌ê原意是teh講，「Lín主張tio̍h納稅hō͘羅馬政權，lín也向猶太骨肉抽重稅，這是lín將家己出賣hō͘該撒，因為，lín bē當bē記，lín是歸屬上帝ê猶太人。」

○ 耶穌譬喻ê重點

Tī耶穌ê譬喻、講道、kap人對話內，伊習慣將最要緊ê信息khǹg tī結尾ê hit句話。親像好ê撒瑪利亞人ê譬喻，尚要緊ê一句話，就是「你去照ánni來行」（路加福音十章37節）。Tī愚憨ê富人譬喻，主要ê信息，也是最後hit句話，「見若為tio̍h家己積聚錢財，tī上帝ê面前無好額ê，也是ánni。」（路加福音十二章21節）Tī法利賽人kap抽稅ê祈禱，khah強調ê是「卑微ê，beh高昇伊」。Tī耶穌kap富有少年官ê對話內，上重要ê，也是結尾所講，「koh來跟隨我」。Tī耶穌醫治破病ê人，上重要ê神蹟意義，也是tī結尾，「起來，做你去，你ê信有救你。」（路加福音十七章19節）Tī撒該悔改ê事件，結尾ê話，是「人子到，是beh chhōe失落ê，來救伊。」（路加福音十九章10節）Tī門徒相爭做大ê對話中，上要緊ê，也是結尾，「因為人子到.... . . 是beh hō͘人差用，koh獻伊ê性命來贖回濟濟人。」（馬可福音十章45節）因此，咱會當真明顯看見，耶穌講，「lín tio̍h將該撒ê物納hō͘該撒，將上帝ê物納hō͘上帝。」m̄是指伊贊成in納稅hō͘該撒ê主張，乃是teh諷刺、提醒in m̄ thang做「猶奸」，m̄ thang藉納稅ê名義，欺壓散赤ê骨肉、同胞；提醒in，tio̍h記得家己做猶太人ê身分，是歸屬上帝ê人。暗示in m̄ thang依附外來ê政權，出賣家己做猶太人ê尊嚴。因此，最後耶穌也是以「政治叛亂」ê因由受起訴定罪，m̄是因為宗教上ê褻瀆受起訴。耶穌這句名言，並m̄是主張「政教分離」，乃是強調「上帝ê主權」kap「做人基本ê良知」。

○主權tī上帝

Tī耶穌受審判ê時，伊也反駁比拉多，認為「主權tī上帝，m̄是tī該撒。」比拉多講：「Kiám m̄知我有權thang放你，也有權thang釘你tī十字架mah？」耶穌回答，「若m̄是tùi頂面hō͘你，就你無權thang辦我。」（約翰福音十九章10－11節）Tī chia，「頂面」m̄是指該撒，是指上帝。這是耶穌一貫ê主張，「主權tī上帝，福利tī百姓。」耶穌生長tī散赤、受看輕ê地區，伊體驗散赤、弱者、飢餓所受ê艱苦，伊kap in做厝邊，kap in khiā tàu陣。伊看輕富人所建立ê司法制度，伊無存向望tī外來政權ê審判，伊tī審判中無開嘴。因此，真明顯，耶穌並無主張「做順民」á是承認「納稅hō͘該撒」ê正當性。伊m̄ ài明講「反對納稅hō͘該撒」，伊借tio̍h用間接ê動作kap對話來暗示，koh進一步諷刺in是「猶奸」－－出賣家己ê尊嚴，這tútú kap in tī最後無承認上帝ê主權kāng款。In講，「該撒以外，阮無王。」（約翰福音十九章15節）這是chiahê人ê真面目，連上帝ê主權也否認掉，甘願依附外來ê政權，欺壓同做上帝選民ê骨肉。

耶穌這句話ê重點，也m̄是teh強調「猶太種族主義」，伊所強調ê，是tio̍h kap弱勢者khiā tàu陣。M̄ thang勾結外來ê強勢政權，來欺壓弱勢ê同胞。對受剝削者ê同情，是耶穌一貫ê信息kap作風。耶穌ê跟隨者，大多數是無受正式教育ê漁夫、勞工（使徒行傳四章13節），親像今á日台灣參與群眾運動ê人，大多數是「穿chhián拖á，食檳榔」ê農民勞工，致到耶穌受誤解有政治上ê企圖，最後也以政治犯ê罪名受起訴、受釘死。耶穌受審ê時，比拉多問講：「你是猶太人ê王mah？」（約翰福音十八章33節）。耶穌受釘十字架，罪名ê牌á寫「猶太人ê王」（約翰福音十九章22節）。因此，chiahê依附外來政權ê希律黨來問耶穌「納稅ê正當性」，目的是真清楚，想beh掠耶穌ê話柄，thang做伊「叛亂」ê證據（馬可福音12章13節）。但耶穌閃開政治性ê問題，直接質問in「做猶太人ê良知」。耶穌質問in為啥物bē記得家己ê出身，bē記得家己是歸屬上帝ê人，為啥物反轉去依附外來政權來欺壓家己ê同胞。耶穌認為，這m̄是政治上ê問題，是做一個人基本ê良知。

○做歸屬上帝ê人

今á日，台灣人受外來政權壓制四百年，一直受看做是二等國民。「三年一小反，五年一大反」，這種ê現象kap耶穌當時出身ê加利利非常kāng款（使徒行傳5章37節）。抗爭強權ê情結，是出tī基本ê生存權利。這kap「宗教」是完全無牽礙ê，這也m̄是政治ê問題，這是做一個受欺壓ê人基本ê責任kap覺醒。耶穌責備「法利賽人」（知識份子）做「順民」，也責備希律黨做「猶奸」，伊講「Lín是歸屬上帝ê人」，tio̍h ài有人ê款式。這m̄是「納稅」ê問題，乃是「認同」ê問題。Lín若是認同該撒，就會壓制猶太ê散赤人；lín若是歸屬上帝，若認同做猶太人，lín就會有人應有ê款式。

「Lín tio̍h將該撒ê物納hō͘該撒，將上帝ê物納hō͘上帝」，咱是beh認同外來ê政權，á是beh認同做台灣人neh？