《台語荒漠甘泉（全羅版）》

 | | | 轉寄

"Kiâⁿ tī thâuchêng"

作者 陳清俊 翻譯 2007.01.14

listen









It ge̍h cha̍psì ji̍t

"Íkeng chiong kakī ê iûⁿ lóng pàng i chhutkhì, chiū chòethâu kiâⁿ," (Iokhān hokim 10:4)

Pàng iûⁿ chhutkhì tùi I kap lán lóng sī chin khùnlân ê sū. Ài chhutkhì, koh kiò lán siū khó͘, koh bōe tàng bô pàng. Putsî tī ane̍k ê khoânkéng tùi lán bô līek. Só͘í I tio̍h pàng iûⁿ chhutkhì, hō͘ iûⁿ tī soaⁿpho téng oa̍htāng tit oa̍hkhì. Siāngkhoán, kanglâng ài phài chhutkhì siukoah, bô hō͘ se̍kse̍k ê chhek'á lak lo̍h tē húnōa, phahsńg khì.

Siōngtè koattēng phài lán khì, tio̍h khiā khílâi, jīnchin khì chòe, khiā teh m̄ tíntāng bô hóchhù. Ū Chú chûài ê chhiú teh khan, lán thang hiòng chêng, tī I ê miâ chìnji̍p chhiⁿchhùi ê chháutiûⁿ, anchēng ê chúipiⁿ, koânkē bô pîⁿ ê soaⁿlêng. (Siphian 23:2) I kiâⁿ tī thâuchêng, thâuchêng sī símmi̍h, I tāiseng chai, tāiseng tú tio̍h, lán ê sìnsim kuntè I ê hêngiáⁿ. Nā sī bô khòaⁿ tio̍h I ê sî, khólêng thâuchêng ū gûihiám. Kiùchú só͘ kengle̍k ê chhìthàm, I ài lán jímsiū. I bô kiò lán kiâⁿ tī thâuchêng, I chai chit ê lō͘ bô chin pháiⁿ kiâⁿ, bōe chin chia̍h la̍t, chiah ōe kiò lán kiâⁿ. Lán thang hòngsim hiòng chêng kiâⁿ.

Che chiūsī siū chiokhok ê jînseng: bô hoânló lō͘ jōa hn̄g, bô khòalū āu chi̍t pō͘, bô iuchhiû beh ánchóaⁿ soán tó chi̍t tiâu lō͘, iā bô tamsim behlâi ê tāngtàⁿ jōa tōa, koaikoai ansim tè Tōa Bo̍kchiá ê khapō͘, chi̍tpō͘, koh chi̍tpō͘ ansim kiâⁿ.

O͘thiⁿ àmtē, m̄ chai bīlâi,
Jînseng àmtām, o͘àm itti̍t lâi,
Ǹgbāng chi̍ttiám'á kng chhuthiān,
“I kiâⁿ tī thâuchêng”,sī góa só͘ chai.

Gûihiám kàu, góa chin kiaⁿ,
M̄ chai beh ánchóaⁿ kiâⁿ?
Chóngsī góa sio̍k tī I, I chhōa lō͘,
“I kiâⁿ tī thâuchêng” góa sim antiāⁿ.

Imiáⁿ, iulū tah góa,
Tamsim hó jînseng bōe tòa;
Chóngsī I ê ōe, chòe góa ê kó͘lē,
“I iáu sī tī thâuchêng” góa só͘ óa.

I kiâⁿ thâuchêng, góa só͘ anùi!
I kiâⁿ thâuchêng, góa kap I chòetui,
I kiâⁿ thâuchêng, póchèng titkiù.
I kiâⁿ thâuchêng, ansūn siōng súi.
－J.Danson Smith

Tanghong ê bo̍kchiá lóng sī kiâⁿ tī iûⁿkûn ê thâuchêng. I kiâⁿ tī chòe chìnchêng ê só͘chāi, bôlūn símmi̍h beh kongkek iûⁿkûn, lóng sī I tāiseng siū kongkek. Taⁿ Siōngtè tī thâuchêng, I sī lán ê chionglâi, lán só͘ kiaⁿ ê bêng'áchài, I tī hia, lán só͘ beh kè ê múi chi̍t ê bêng'áchài, I lóng seng íkeng tī hia chúnpī lah. F.B. Meyer

Bêngji̍t Siōngtè tī hia,
Ansim kè kin'áji̍t, bián kiaⁿ.
Bêngji̍t ji̍tthâu chhutlâi, hoat kngliōng,
Chhōa lán, sù lán le̍kliōng.
Loánjio̍k I sù le̍kliōng,
Aithiàⁿ, I sū ǹgbāng, honghiòng,
Iusiong tit anùi, kiankiông,
Lo̍hhō͘ āu koh chhut ji̍tthâu, chin chèngsiông.

附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com.tw