《台語荒漠甘泉（全羅版）》

 | | | 轉寄

"Bi̍tsek tiong ê khésī"

作者 陳清俊 翻譯 2009.04.05

listen


Sì ge̍h chhoegō͘ (Sì ge̍h gō͘ ji̍t)

"Tio̍h ji̍p chhù, koaiⁿmn̂g, lí kap lí ê kiáⁿ tiàm lāibīn," (Ṳ Lia̍tôngkì 4:4)

Chit ê kóaⁿhū kap i ê kiáⁿ pitsu tanto̍k kap Pē Siōngtè tīteh. In beh chhùlí ê, m̄ sī chūjiân ê hoatchek, m̄ sī chènghú, m̄ sī kàuhōe, iā m̄ sī bo̍ksu, sīmchì m̄ sī Thiⁿpē úitāi ê sianti Ílīsa. In pitsu kap lâng kehlī, bôkoán lâng ê lítì, tûkhì chūjiânlu̍t, ná chhinchhiūⁿ hōng hiat tī pòaⁿ khongtiong chi̍tiūⁿ. Só͘ thang khò ê chíū Pē Siōngtè natiāⁿ, chiūsī sînjiah ê goânthâu lâi chiapchhiok.

Che sī Pē Siōngtè chhùlí lán sūbū ê chi̍t chióng pānhoat, lán pitsu chìnji̍p chi̍t keng kîtó kap chhauliān sìnsim ê kehlī pìbi̍tsek, tī hia beh ū honghong hùhù ê sêngkó tit tio̍h. Ūsî Thiⁿpē ōe chō chi̍t chō chhiûⁿ sìbīn ûi lán, tû khì lán pêngsiông ê óakhò, chhú khì lán pêngsiông ê pānsū hoānsek, chiong lán koaiⁿ tī chi̍t ê sio̍kthiⁿ, choânsin, liāusióng bōe tio̍h ê khoânkéng ni̍h, sī lán kèkhì só͘ bô ê kenggiām, lán iā m̄ chai beh hoatseng símmi̍h tāichì. Lán ê sengoa̍h chhinchhiūⁿ chi̍t phit pò͘, Thiⁿpē chiàu I ê siōngsin ê tô͘iūⁿ lâi chián lâi chhâi, lán chíū choanit gióngbōng I.

Tōatosò͘ ê kitoktô͘ kè tantiāu ê sengoa̍h, tùi só͘ hoatseng ê sūbū chhaputto lóng liāusióng ōe kàu. Chóngsī Thiⁿpē chhōa lâng chìnji̍p bōe thang ūchhek ê chênghóng, sī iû I kehlī chhutlâi ê, lâng chíū chai Thiⁿpē teh pópì in, tī tùihù in ê sìⁿmiā, itchhè ê ǹgbāng sī oânchoân tùi I lâi.

Lán ài chhinchhiūⁿ chit ūi kóaⁿhū, pitsu kap itchhè gōachāi ê sūbu̍t kehlī, tùi lāisim oânchoân óakhò I, jiânāu chiū beh khòaⁿ tio̍h I só͘ tùi lán kiâⁿ ê sînjiah, kîsū. – tùi “Lêngniû”

Siōngtè ài lâng jīnbat I siōnghó ê lō͘kèng, chiūsī hō͘ lâng kengle̍k tio̍h siōng kanlân ê khógiām. – tùi “Póchio̍h”

Tng Siōngtè koaiⁿ lán tī bi̍tsek tiong,
Tng lán tī iusiong kankhó͘, I kóng,
Kehlī soanhôa, Sim tùi sim siongthong,
Khésī lán pópòe ê susióng.

附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com