《台語荒漠甘泉（全羅版）》

 | | | 轉寄

"Khiāteh"

作者 陳清俊 翻譯 2009.04.19

listen



Sì ge̍h cha̍pkáu (Sì ge̍h cha̍pkáu ji̍t)

"M̄ bián kiaⁿ, chòe lín khiāteh, khòaⁿ Iâhôhoa kin'áji̍t ūi tio̍h lín só͘ beh kiâⁿ ê chínkiù." (Chhutaiki̍pkì 14:13)

Chit ê kengbûn sī Siōngtè hō͘ lán chi̍t ê bēnglēng, tng lán tú tio̍h chêngsè gûikip, khoânkéng cha̍phun khùnlân ê sî thang ēng. Tng góa chìn bô lō͘, thè bô pō͘, chiàⁿpêng tòpêng iā siū chó͘tòng ê sî, góa tio̍h ánchóaⁿ chòe? Chú ê ōe kóng, "Khiā tiāⁿtiāⁿ," hitsî, góa siōnghó ê chheklio̍k chiūsī thiaⁿ Siōngtè ê ōe. Hit sî, ū lâng ōe kā lí kiàngī, khó͘khǹg, sīmchì choa̍tbāng lâi kóng, "Hòngkhì ah, sísim ah!" Tī chit ê siōng khùnlân, siōng pháiⁿ ê sîkî, Siōngtè ài lán ū ióngkhì, koh ōe hílo̍k, chengsîn kohchài tínchok khílâi, khaksìn I ê thiàⁿthàng kap sìnsi̍t.

Bô táⁿ ê lâng beh kóng, "lí ài thè tńgkhì, hôethâu kiâⁿ íchêng sèkan lâng só͘ kiâⁿ ê lō͘, m̄ thang kè kitoktô͘ ê sengoa̍h, che tùi lí thài lân lah, hòngkhì lí ê goânchek ah."Chóngsī Sattàn bôlūn ánchóaⁿ pek góa khì kuntè i, góa lóng bōe khì tè i. Inūi góa sī Chinsîn ê kiáⁿjî, Chú sio̍kthiⁿ ê bēnglēng ài góa hiòng chêng kiâⁿ, "ná kiâⁿ, khùila̍t ná kethiⁿ." (Siphian 84:7) Góa goān thiaⁿ Chú ê bēnglēng, bôlūn sī síbông, á sī tē ge̍k lóng bōethang hō͘ góa ê honghiòng káipiàn. Nāsī I kiò góa "tòngtiāⁿ, khiāteh," chi̍tsî'á kú, che sī hō͘ góa hoeho̍k le̍kliōng ê kihōe, ōethang íāu ēng kohkhah tōapō͘ hiòng chêng kiâⁿ.

Kipsèng, bô nāihoân ê lâng ōe kóng, "khílâi chòe sū! Khiāteh sī lánsi, pîntōaⁿ" Góa ūisímmi̍h ōe siūⁿ tio̍h kakī lâi chòe, khiok bô gióngbōng Chú neh? Kîsi̍t, Chú teh chòe tāichì, m̄ nā ánni, I teh chòe só͘ū ê tāichì.

Chūko, siuⁿ chhongbêng ê lâng beh lâi khoakháu kóng, "Kású sī hái lâi teh tòng lō͘, lí chiū putkoán jûhô ta̍h ji̍p háini̍h, hibōng ū kîjia̍h hoatseng." Chóngsī chinchiàⁿ ū sìnsim ê lâng, choa̍ttùi bōe thiaⁿthàn chūko, kipsèng, bôtáⁿ á sī choa̍tbāng. I chí thiaⁿ Siōngtè kóng, "Khiāteh." Jiânāu ná chhinchhiūⁿ chio̍hthâu tī hia khiā tiâutiâu.

"Khiāteh" pitsu póchhî khiā ê chusè, sī chúnpī sûisî beh hêngtōng, teh thènghāu sin ê bēnglēng, hoaⁿhí nāisim teh thènghāu Chú ê siaⁿim. Bôkú I beh tùi góa kóngōe, chhengchheng chhóchhó, chhinchhiūⁿ I hoanhù Mô͘se kā Íseklia̍t lâng kóng, "chìnchêng khì." (Chhutaiki̍pkì 14:15) chi̍tiūⁿ. Charles H. Spurgeon

Anchēng, ūisímmi̍h tio̍hkip beh kakī káikoat,
Siōngtè chai ta̍k hāng, I ōe kín ōe bān, bô cháuthoat,
Siōng hó khò sìnsim, m̄ sī khò ba̍kchiu, ha̍ksoat,
Sìnkhò, koh sìnkhò, lí beh chai pìkoat,
Tī ji̍tkng ē, I ê chhiòiông chài chhuthoat.

Tī bô tiāⁿ tio̍h, tiûtû ê sî, ài thènghāu. Tī hoâigî ê sî, ài thènghāu, m̄ thang kiôngpek kakī hêngtōng. Tng lí ê simlêng siū apchè, m̄ thang thiaⁿthàn, ài thènghāu, kàu ū lō͘ thang kiâⁿ ê sî.


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com