《台語荒漠甘泉（全羅版）》

 | | | 轉寄

"Bô khò ba̍kchiu khòaⁿ ê sìnsim"

作者 陳清俊 翻譯 2009.08.23

listen


Poeh ge̍h jīsaⁿ (Poeh ge̍h jīcha̍psaⁿ ji̍t)

"Tùi sìn, Apekla̍hhán siūtiàu ê sî, chiū sūn bēnglēng chhutkhì, … I chhutkhì, m̄ chai beh khì tálo̍h." (Hipeklâi 11:8)

Che sī bô ēng ba̍kchiu khòaⁿ ê sìnsim. Ba̍kchiu só͘ khòaⁿ ê m̄ sī sìnsim sī thuilí. Góa ū chi̍tpái chē chûn hoâiⁿkè Tōaseiûⁿ, koanchhat tio̍h sìnsim ê goânchek. Góa bô khòaⁿ tio̍h háibīn ū ōe chhut símmi̍h lō͘kèng, iā bô khòaⁿ tio̍h hōaⁿ á sī lio̍ktē, chóngsī múiji̍t tī háitô͘sek piauchhut chûn ê chìnhêng só͘chāi, ná chhinchhiūⁿ háibīn ōe chi̍t tiâu pe̍hsòaⁿ, chûn chiàu ánni sái. Kàu Tōaseiûⁿ ê hitpêng hōaⁿ, goán iā chai hit ê sī símmi̍h só͘chāi. Chi̍t tiám'á chengchha mā bô, ná chhinchhiūⁿ tī saⁿchheng lí gōa ê só͘chāi chiū khòaⁿ tio̍h tùipêng hōaⁿ chi̍tiūⁿ.

Kiâⁿchûn cháiⁿiūⁿ ōe chiahnih chèngkhak kèōe chhutlâi neh? Inūi chûntiúⁿ múiji̍t theh gîkhì koanchhat thiansiōng, tùi ji̍tthâu ê ūitì lâi koattēng kiâⁿ ê lō͘sòaⁿ, i kiâⁿchûn sī ēng thiⁿténg ê kng, m̄ sī ēng tē bīn ê kng lâi chhōa lō͘.

Chinchiàⁿ ê sìnsim iā hiòng téngbīn koankhòaⁿ lâi kiâⁿchòe, sī ēng Siōngtè ê tōa thàiiông kng, i bô khòaⁿ háihōaⁿsòaⁿ, bô khòaⁿ tē bīn ê tengthah, á sī iânlō͘ ê siólō͘, siótó. Sìnsim ê khapō͘ óngóng chhōa ǹg choânjiân bô páak sīmchì o͘àm kap chailān tiong. Chóngsī Siōngtè ōe khuilō͘, siôngsiông hō͘ pòaⁿmî siōng o͘àm ê sîchūn piànchòe lêbêng hiahnih kngliōng.

Hō͘ lán kimji̍t chiū khíphâng, sáichûn, suijiân m̄ chai, iā khòaⁿbô chiântô͘, tānsī thang oânchoân lâi sìnkhò. tùi “Tī tē ná tī thiⁿ”

Chinchōe lâng tī khaisí íchêng, chiū beh ài khòaⁿ tio̍h i hoattián ê choânpō͘. Siūⁿ khòaⁿ māi, lán nā ōe khòaⁿ tio̍h tùi thâu kàu bé ê choânpō͘ lō͘thêng, lán ánchóaⁿ ōe hoathui kitoktô͘ ê unsù neh? Sìnsim, hibōng, thiàⁿthàng bōe chhinchhiūⁿ phôngkó kàu se̍k chūjiân tùi chhiūténg la̍k lo̍hlâi chi̍tiūⁿ. Àikìtit, sèngkeng ê thâu chi̍tchat, “Goânkhíthâu” só͘ chiap lo̍hkhì ê jī sī “Siōngtè”. Che sī lán ēng sìnsim lâi chūn sósî khaitōng Chú ê hoattiānchhiúⁿ ê mn̂g ê thâu chi̍t pō͘. Bô m̄ tio̍h, Siōngtè pangchān chūkí lóle̍k, chūkí pangchān ê lâng, chóngsī Siōngtè iā pangchān hiah ê bûchō͘ nńgchiáⁿ ê lâng. Só͘í bôlūn khoânkéng jûhô, múipái lóng thang óakhò I.

Tánthāi Siōngtè chhōa lán kiâⁿ kàu lútô͘ ê chiongtiám pí lán ēng kha kakī kiâⁿ ke kín chinchōe.

I íkeng chhutlēng ài lán hêngtōng, lán iáu teh tiûtû símmi̍h? M̄ thang hō͘ kihōe chi̍tpái koh chi̍tpái sitkhì ah.


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com