《台語荒漠甘泉（全羅版）》

 | | | 轉寄

"Chhiùⁿkoa oló"

作者 陳清俊 翻譯 2010.02.14

listen


Jī ge̍h cha̍psì (Jī ge̍h cha̍psì ji̍t)


"Tio̍h siôngsiông tiàmtī Chú lâi hoaⁿhí; góa beh koh kóng i, Tio̍h hoaⁿhí." (Huili̍ppí 4:4)

"Khò Chú siôngsiông hoaⁿhí" sī chin súi ê sū. Khólêng lí bat chhìkè, chóngsī bô hāukó. Mái khì siūⁿ pa̍thāng, kèsio̍k hiòng chêng chòe. Sīmchì tng lí jînseng bô piànhòa, bô kámkak chi̍ttiám'á hílo̍k, sengoa̍h bô chi̍ttiám'á kó͘lē, iáu sī beh hílo̍k, "tio̍h lóng lia̍h chòe hoaⁿhí" (Ngákok 1:2). Sèngkeng ánni kóng, "hāmlo̍h tī chōechōe iūⁿ ê chhìliān" (Ngákok 1:2) ài lia̍h chòe hoaⁿhí, hoaⁿhoaⁿ híhí chiapsiū i. Lí ê sìnsim ōe tit tio̍h pòsiúⁿ. Lí kiám beh siongsìn Thiⁿpē hō͘ lí giâ I sènglī ê tōakî, khiā tī chiàntiûⁿ ê thâu chi̍t sòaⁿ, I tiāmtiām pàng lí hông lia̍hkhì, á sī hông phahpāi, khiok m̄ chhap mah? Choa̍ttùi bōe! I ê Sènglêng pósiú lí hō͘ lí ióngkám chìnchêng, sim tiong chhiongmóa hílo̍k kap oló. Lí lú hílo̍k, lêngle̍k lú kethiⁿ.

Chú ah! kàsī góa khò Lí lâi hílo̍k, koh "siôngsiông hoaⁿhí" (I Thiapsatlônîka 5:17)

Siōng jio̍k ê sèngchiá ia̍h ōe iâⁿ Sattàn,
I ê chiànsu̍t sī oló Siōngtè ê siaⁿ tōa tân.

"Tio̍h hō͘ Sèng Sîn chhiongmóa; ēng si, ēng koa, ēng sîn ê hù, tāike saⁿ ìntap, ēng sim gîm si chokga̍k lâi oló Chú;" (Íhutsó͘ 5:18,19)

Pólô tī chit nn̄g chat ê kengbûn kó͘lē lán ēng chhiùⁿkoa lâi keklē lêngsèng. I khǹg tho̍kchiá m̄ sī tuikiû jio̍kthé ê hióngsiū, sī tuikiû simlêng ê boánchiok; m̄ sī sinthé ê chhìkhek, sī lênghûn ê titkiù.

Kitoktô͘ siôngsiông chhiùⁿkoa,
Hó kah bôsiūⁿ tio̍h ê tōa.

Lán lâi chhiùⁿ koa, suijiân lán bô kámkak hoaⁿhí; ánni ōe hō͘ lán kha khah ū la̍t, iàsiān hòa chòe le̍kliōng. John Henry Jowett

Tī pòaⁿmî Pólô kap Selah kîtó, chhiùⁿkoa oló Siōngtè, Chèng siûhoān iā àⁿhīⁿ thiaⁿ. (Sùtô͘ hēngtoān 16:25)

Pólô ah, Lí hō͘ goán chin súi, chin kîbiāu ê bô͘iūⁿ! Lí "sengkhu ū tài Iâso͘ ê hûnjiah" (Kalia̍pthài 6:17) ēng che êngiāu oló I. Lí ê hûnjiah tùi tóūi lâi? Sī tùi lí chha chi̍ttiám'á hō͘ chio̍hthâu tìmsí, tùi saⁿpái hō͘ lâng ēng kùn phah (Ṳ Kolîmto 11:25), hō͘ Iûthài lâng piⁿ phah chi̍tpah káucha̍p gō͘ ē, koh tī Huili̍ppí kaⁿga̍k tiong hōng phah kah lâuhuih, só͘ tit ê. khaksi̍t. Lí jímsiū chiah ê khó͘chhó͘, tī thòngkhó͘ tiong iáu tōa siaⁿ chhiùⁿkoa, oló Chú. J. Roach

Lán khò Chú siôngsiông hoaⁿhí,
M̄ kiaⁿ chhìthàmchiá ê àmchìⁿ,
Sattàn só͘ kiaⁿ ê, m̄ sī tōa siaⁿ kap i chìⁿ,
Khiok sī lán ê chhiùⁿkoa kap gîmsi.


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com