《台語荒漠甘泉（全羅版）》

 | | | 轉寄

"Sìnsim ê kiâⁿchòe"

作者 陳清俊 翻譯 2010.03.28

listen

Saⁿ ge̍h jīpoeh (Saⁿ ge̍h jīcha̍ppoeh ji̍t)

"Kàu kng phó͘thiⁿē ê Chú Iâhôhoa ê iokkūi ê chèsi, in ê kha khiā tī Ioktàn hô ê chúi, Ioktàn hô ê chúi, chiūsī tùi téngbīn lâu lo̍hlâi ê chúi, beh chia̍ttn̄g, khiā khílâi kuitui." (Ioksua 3:13)

Ta̍k ê lâng lóng khimphòe hiah ê ióngkám ê Lībī lâng! In kng iokkūi kàu chúini̍h, hô chúi sī ài kàu "kha ta̍h ji̍p chúi" (Ioksua 3:15) chiah punkhui. Siōngtè ê èngún chísī ánni. Siōngtè só͘ khòaⁿtiōng ê sìnsim, chiūsī kiantēng ê sìnsim, chí khòaⁿ I ê èngún, kap gióngbōng I ê sìnsim. Lán thang sióngsiōng, kimji̍t ê pôngkoanchiá (khiā tī piⁿ'á khòaⁿ ê lâng) beh tùi tngsî Siōngtè ê sèngtô͘, jûhô kng iokkūi hiòng chêng kiâⁿ ê sî, kóng, "Goán éng bô ài bō͘ hit ê gûihiám. Iokkūi ōe hō͘ chúi chhiongkhì oh." Chóngsī hiah ê chèsi tī tatē tiāmtiām khiā teh. (Ioksua 3:17) Lán bô tit hutlio̍k chit kiāⁿ sū, chiūsī lán ê sìn ōe pangchān Pē Siōngtè chiphêng I ê kèōe. Lán ài goānì pangchān Chú.

Iokkūi nn̄g pêng ū kǹg, chèsi chiong in kng tī kengkah téng. Siōngtè ê iokkūi pēng bōe kakī tíntāng, sī ài lâng lâi kng ê. Siōngtè sī kiàntio̍ksu, lâng sī thia̍p chng ê lâng, sī kanglâng. Lâng ê sìnsim thang pangchān Siōngtè, hō͘ saichhùi ha̍pha̍p, ōe siaubia̍t ū tōa phòhoāi ê hé. Sìnsim kèngtiōng Siōngtè, Siōngtè iā chuntiōng sìnsim.

Ah, lán suiàu chit chióng ê ióngkám hiòng chêng ê sìnsim, hō͘ Siōngtè tī I só͘ tiāⁿ tio̍h ê sî si̍thiān I ê èngún. Lán tângchôe chòe Lībī lâng ê, hō͘ lán kng khí lán ê tāngtàⁿ, tāngkūi, m̄ thang chhinchhiūⁿ kng koaⁿchhâ hit khoán ê pisiong; àichai, lán só͘ kng ê sī éngoa̍h chin Sîn ê iokkūi, thang tōa siaⁿ chhiùⁿ koa, hiòng tōa chúi chìnchêng kiâⁿ! Thomas Champness

Tī siniok kàuhōe sîtāi ê chi̍t ê te̍kpia̍t ê piaukì chiū sī "Tōatáⁿ" thè Siōngtè chòe tōasū. Ǹgbāng Siōngtè beh sêngchiū tōasū ê sìnsim, ū chi̍t ê tōa koh tiōngiàu ê insò͘, chiūsī sînsèng ê tōatáⁿ kap bô kiaⁿhiâⁿ. Thang ǹg Siōngtè thó khah chōe. Si̍tchāi kóng, "thó khah chōe" pí "thó khah chió" sī khah iôngī. Pêng sìnsim tōatáⁿ khiā chāi, pí siósim khiātī hōaⁿpiⁿ khah iôngī.

Chhongbêng ê chúisiú pêng sìnsim, chiong chûn khui kàu chúi chhim ê só͘chāi. Beh hoatkiàn, chāi Siōngtè bô ū ohchòe ê sū. (Lō͘ka 18:27). "Ū sìn ê lâng, ta̍k hāng lóng ōe" (Mákhó 9:23)

Kin'áji̍t, hō͘ lán lâi thè Siōngtè chòe úitāi ê sū, chiapsiū I só͘ sù ê sìnsim, siongsìn ōe chòe úitāi ê sū, khò I ê le̍kliōng lâi oânsêng. – tùi “Tī tē ná tī thiⁿ”

附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com