《台語荒漠甘泉（全羅版）》

 | | | 轉寄

"Sòehàn thau bán pû, tōahàn thau khan gû"

作者 陳清俊 翻譯 2010.04.04

listen

Sì ge̍h chhoesì (Sì ge̍h sì ji̍t)

"Ílīsa kîtó kóng, Iâhôhoa ah, kiû Lí khui i ê ba̍kchiu, hō͘ i ōe khòaⁿkìⁿ." (Ṳ Lia̍tôngkì 6:17)

Che sī lán suiàu ūi kakī kap pa̍tlâng hō͘siong kîtó ê kîtósû: "Chú ah, kiû Lí khui goán ê ba̍kchiu, hō͘ goán ōe khòaⁿkìⁿ, hō͘ goán chhinchhiūⁿ sianti Ílīsa hō͘ "piàn soaⁿ hébé héchhia ûi," (Ṳ Lia̍tôngkì 6:17) tánthāi chài goán khì êngkng sènglī ê só͘chāi.

Ittàn khui lán ê ba̍kchiu, lán piān ōe chiong itseng tōatōa sòesòe, piai á sī hílo̍k ê sū khòaⁿchòe sī lâi póhō͘ lán lênghûn ê "chiànchhia". Lán nā ōe ánni khòaⁿ, lán só͘ tú tio̍h ê itchhè lóng sī beh chài lán ê chiànchhia. Hoánbīn lâi kóng, sòesòe ê chhìthàm, lán nā bô chha̍p i, i iā ōe tōa kàu ōe tehchhùi lán thâuchêng ê itchhè ê mi̍h, hō͘ lán thòngkhó͘ kap choa̍tbāng.

Chhapia̍t sī chāitī lán jûhô soánte̍k, m̄ sī chāitī sū ê púnsin, sī chāitī lán tùi sū ê khòaⁿhoat. Nāsī lán beh tóteh, hō͘ itchhè ê mi̍h lâi tè, lâi géng tī lán ê sinchiūⁿ, lán ōe hông géng kàu chhùikô͘kô͘, ánni hitê mi̍h chiūsī khòngchè bōetiâu ê húibia̍tchhia; nāsī lán peh tī chhia téng, sái hit ê mi̍h, i chiū piàn chòe sènglīchhia. In chiūsī Siōngtè ê "héchhia", kháisoân chiong lán tòa hiòng chêng, tòa chiūⁿ thiⁿ. Hannah Whitall Smith

Chi̍t ê siū tehchhùi ê lêng, liân Chú iā bô pānhoat. Che sī ūisímmih hit ê hoántùi lán ê Sattàn, lóng beh hō͘ Siōngtè ê chúbîn tùi in ê khoânkéng, kámkak choa̍tbāng, bô lâng thang pangchān. Ū lâng kóng, kuntūi ê sūkhì nā kē kē, sànbān bô chengsîn, khì chiàntiûⁿ ittēng ōe su, ōe sitpāi. Góa thiaⁿ tio̍h chi̍t ūi thoânkàusu, kóng i hôekok chiū phòapīⁿ, simchêng chin bái, inūi i chengsîn siōng íkeng sitkhì ióngkhì, chiū ínkhí sinthé bô hósè, soah phòapīⁿ.

Lán tio̍h ài jīnbat Sattàn jûhô tákek lán ê simlêng kap jûhô lâi tíkhòng ê honghoat. Nāsī i ōe iôtāng lán ê li̍ptiûⁿ, i chiū beh ēng tn̂gkî ûikhùn ê honghoat "In beh chhiúⁿtoa̍t ông ê koân, húihoāi i, bia̍tbô i kàu thiattí." (Tānílí 7:25) ti̍tkàu lán loánjio̍k soah hòngkhì itchhè sènglī ê hibāng.


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com