《台語荒漠甘泉（全羅版）》

 | | | 轉寄

"Siōngtè ê pêngiú"

作者 陳清俊 翻譯 2010.05.09

listen


Gō͘ ge̍h chhoekáu (Gō͘ ge̍h káu ji̍t)

"Apekla̍hhán iáu khiā tī Iâhôhoa ê bīnchêng." (Chhòngsèkì 18:22)

Tī chit chiuⁿ, Apekla̍hhán ūi kîthaⁿ ê lâng ê sìⁿmiā kiû. Lán chòe Siōngtè ê pêngiú iā ōethang ánni chòe. Putkò lí beh siūⁿ kakī ê sìnsim bô Apekla̍hhán hiah tōa, kap Siōngtè ê kaupôe iā bô hiah chhim. Chóngsī m̄ bián hoesim. Apekla̍hhán ê sìnsim mā m̄ sī chi̍tpō͘ tengthian, sī chi̍tpō͘ chi̍tpō͘ kiâⁿ chhutlâi, lán iā ōethang ánni lâi chòe.

Ū sìnsim kengkè khógiām teksèng ê lâng, iáu ū khah tōa ê khógiām ōe lâi. Siōng hó ê póchio̍h sī kengkè siōng iōngsim ê chhiat, koah, bôa. Siōng kùitiōng ê kimsio̍k sī kengkè siōng bénglia̍t ê hé ê thoànliān. Lí thang khaktēng, Apekla̍hhán nā bô kengkè siōng giâmkeh ê khógiām, éng bōethang chheng chòe "sìnsim ê pē."

Khòaⁿ Chhòngsèkì jīcha̍pjī chiuⁿ, tī tē jī chat, Siōngtè tùi Apekla̍hhán kóng, "Lí tòa lí ê kiáⁿ, chiūsī lí to̍ksiⁿ ê kiáⁿ, lí só͘ thiàⁿ ê Ísat, khì Mô͘līa ê tōe, Góa só͘ beh chísī lí ê soaⁿ; tīhia chiong i hiànchòe siochè." Sòa lo̍hkhì, khòaⁿ i simchêng tîmtāng, tòa tio̍h khatbōng koh khiampi sūnho̍k khì chiūⁿ Mô͘līa soaⁿ. I chiàu i tiongsim só͘ thiàⁿ só͘ sūhōng ê Siōngtè ê bēnglēng tòa Ísat khì.

Lán nā hoâigî Siōngtè tī lán sìⁿmiā ê chokûi ê sî, tī chia thang ha̍ksi̍p kàsī! Tùi chit ê hoâigî kiaⁿlâng ê chênghóng, bôlūn ēng símmi̍h káisoeh lóng bô lō͘ēng, inūi che sī ēng sūsi̍t ê lē hō͘ kó͘kim ê lâng ê kàsī. Liân thiⁿsài iā kèngùi tī piⁿ'á khòaⁿ. Apekla̍hhán ê sìnsim sīm̄ sī khiā ōe tiâu, beh chiâⁿchòe tùi Siōngtè só͘ ū ê chúbîn ê chi̍t chióng le̍kliōng kap pangchān? I siū ê khógiām sīm̄ sī ōe chèngbêng ēng bô iôtāng ê sìnsim, thang khòaⁿ chhut Siōngtè éngoán sī sìnsi̍t?

Tapàn sī "sī". Apekla̍hhán ê sìnsim thongkè chit ê siōngtōa ê khógiām. Chú ê thiⁿsài lán ê Chú Iâso͘, Iâhôhoa kap I, tī I ê èngún, bôlūn jōa chōe, lóng sī "sī" kap "si̍tchāi" (chhamkhó Ṳ Kolîmto 1:20) tùi Apekla̍hhán kóng, "góa taⁿ chai lí sī kèngùi Siōngtè," (Chhòngsèkì 22:12). Chú si̍tchèsiōng sī tùi i kóng, inūi kengkè chit ê úitāi ê khógiām, lí siongsìn góa, góa iā siongsìn lí, lí thang éngoán chòe "góa ê pêngiú." (Ísàia 41:8) Chú èngún Apekla̍hhán "Góa sùhok beh sùhok lí, ... bānpang beh inūi lí ê hō͘è tit tio̍h hokkhì; inūi lí thiaⁿthàn Góa ê ōe." (Chhòngsèkì 22:17,18)

"Khókiàn kìⁿnā sìn ê lâng kap ū sìn ê Apekla̍hhán tâng tit tio̍h hokkhì." (Kalia̍pthài 3:9) chit kù ōe sī chin, sī éngoán chin ê.

Chòe Siōngtè ê pêngiú m̄ sī siókhóa sū.


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com