《台語荒漠甘泉（全羅版）》

 | | | 轉寄

"Kiantēng ǹg Siōngtè"

作者 陳清俊 翻譯 2010.07.18

listen

Chhit ge̍h cha̍ppoeh (Chhit ge̍h cha̍ppoeh ji̍t)

"Inūi Iâhôhoa ê ba̍kchiu tī choântōe khòaⁿlâi khòaⁿkhì; kìⁿnā choansim ǹg I ê, I beh hiánbêng I ê tōa khùila̍t pangchān i." (Ṳ Le̍ktāichìlio̍k 16:9)

Siōngtè chhē kiû hiah ê sim kiantēng ǹg I ê lâmlú, in chiong itchhè sìnjīm I, I iā jia̍tchhiat ài in chòe khah tōa ê tāichì. Le̍ksú ê sîcheng íkeng tī cha̍pit tiámcheng, chòeāu ê sîchūn lah.

Choân sèkài teh khòaⁿ Siōngtè beh chiong hiah ê kauthok sìⁿmiā hō͘ I ê lâng chòe símmi̍h. M̄ nā choân sèkài, liân Siōngtè púnsin iā teh tán símmi̍h lâng siōng oânchoân chiong kakī hiàn hō͘ I, kamsim pàngsat itchhè, hō͘ Kitok chiâⁿchòe itchhè, oânchoân chiàu Siōngtè ê chíì kiâⁿ sū, ōe chiapsiū Kitok ê khiampi, sìnsim, thiàⁿsim kap le̍kliōng, bōe chó͘gāi tio̍h Siōngtè ê kèōe, éngoán hō͘ I kèsio̍k chòe I kîbiāu ê kangchok. C.H.P.

Lí nā bô kiû kakī ê êngkng, Siōngtè thongkè lí só͘ chòe ê sū sī bûhānliōng ê.

Mílá Jiojí (George Mueller) tī káucha̍p gōa hè ê sî, tùi chi̍ttīn bo̍ksu kap kitoktô͘ kangchokchiá kóng, “Góa sī tī 1825 nî 11 ge̍h sìn Chú, tānsī kàu 1829 nî 7 ge̍h góa chiah oânchoân chiong góa ê sim kauthok I. Kàu hit sî, góa chiah chai, góa ài bênglī, koânsè, kap sèkan itchhè hiónglo̍k ê sim oânchoân bô khì, Siōngtè chiâⁿchòe góa ê itchhè. Tī I ê lāibīn góa ū itchhè góa só͘ suiàu ê, góa bô kîthaⁿ ê goānbōng. Khò tio̍h I ê untián, góa bêngpe̍k koh tit tio̍h I ê chhiongchiok, ti̍t kàu hiānchāi, hō͘ góa chiâⁿchòe chinchiàⁿ hēnghok ê lâng. Góa só͘ koansim ê chísī Siōngtè ê sū. Chhinài ê sìntô͘ pêngiú, góa mn̄g lín sīm̄ sī chiong púnsin oânchoân kauthok Siōngtè, á sī, lí ê sìⁿmiā tiong, bô chhap Siōngtè tùi lí ê ho͘tiàu, sīm̄ sī iáu ū símmi̍h mi̍h m̄ khéng pàng, á sī kau chhutlâi ê mah?

Tī góa iáubōe kauchhut sìⁿmiā ê íchêng, góa khòaⁿ chinchōe kîthaⁿ ê chheh, hoántńg sèngkeng khòaⁿ khah chió. Tānsī tùi hit tiap khí, I chià tio̍h sèngkeng hō͘ góa bêngpe̍k I ê chinlí, hō͘ góa ū kóngbōechhut ê hokhūn. Góa hiānchāi sêngsi̍t tùi lāisim kóng chhut lâi, Siōngtè sī bûhān kîbiāu ê sîn!”

“Chhiáⁿ lí tiāⁿ tio̍h koatsim, nā bô tùi simlêng siōng chhim ê só͘chāi kóng chhut, ‘Siōngtè sī bûhān kîbiāu ê sîn”, chiū m̄ pàng soah.”

Góa kin'áji̍t ê kîtó sī kiû Siōngtè hō͘ góa chiâⁿchòe chi̍tê te̍kpia̍t ê kitoktô͘. George Whitefield


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.org