《台語荒漠甘泉（全羅版）》

 | | | 轉寄

"Chia̍hkhó͘, chin thoànliān"

作者 陳清俊 翻譯 2011.01.09

listen



Chiaⁿ ge̍h chhoe káu. (It ge̍h káu ji̍t)

“Inūi góa sǹg hiānsî ê kankhó͘ bōe khamtit píphēng só͘ beh hiánbêng kàu tī lán ê êngkng.” (Lômá 8:18)

Góa ū chi̍t ê khok'á (thâng bih tī lāibīn ê khok'á). I ê hêng chin te̍kpia̍t, sī ū chi̍tthâu sòesòe chiamchiam, lēnggōa chi̍tthâu sī tōatōa îⁿîⁿ ê. Tng lāibīn ê thâng tióngsêng ê sî, chiū tùi lāibīn chǹg khok'á chhutlâi piànchòe ia̍h'á.

Ū chi̍tji̍t, góa khòaⁿ chit ê khok'á lāibīn teh tíntāng; tùi sòesòe chiamchiam ê chitthâu khaisí ū thâu teh chhutsiān. Khòaⁿ chi̍tpo͘kú, lóng bô simmi̍h chìntián. Thâng chin ló͘le̍k ài chǹgchhutlâi, iā khok'á só͘ khui chhutlâi ê khangchhùi chin sòe. I chīnla̍t koh thòngkhó͘ (góa siūⁿ) teh chiong chhùikháu piàn tōa, chóngsī chìntō͘ chin bān; kuipō͘kú mā bô símmi̍h piànhòa. Sinkhu hiahni̍h tōa, khangchhùi hiahni̍h sóe, m̄ chai i beh chòe kàu tīsî chiah ōe thang chhutlâi? I sīm̄ sī ū pānhoat thang chǹg chhutlâi? Chòeāu, góa siūⁿ ài pangchān i, hō͘ i khah kín, khah iôngì, khah bô thòngkhó tùi khok'á chhutlâi, chiū siósim chiong khok'áchhùi ka khah tōa khang. Chinchiàⁿ thâng chiū khah iôngì tùi khok'á chhutlâi lah. Góa siūⁿ góa chinchiàⁿ chòe chi̍t ê hósū, ū pangchān i lah. Chin hoaⁿhí.

Bô phahsǹg, chit chiah thâng, ū piànchòe ia̍h'á, chóngsī i ê si̍t bô hoattián kàu tōa, soah bōe tàng pe, chíū phia̍t kúiē chiū bô la̍t, nńgkôkô tó lo̍hkhì, bô kú chiū khiaukhì lah, soah bô chiâⁿchòe chi̍tchiah súisúi ê ia̍h'á thang pelâi pekhì. Chin sitbāng; chiah chai góa chòe liáu chit ê siōnggōng ê tāichì. Hósim beh pangchān i, soah hāisí i.

Ūsî góa khòaⁿkìⁿ lâng teh iusiong, thòngkhó͘, hoānlān teh chengchat, ló͘le̍k ê sî, chiàu lâng (góa) ê ìsù, góa ōe másiōng ēng lâng ê honghoat lâi káithoat i ê khó͘thàng. Góa chiū siūⁿ tio̍h hit chiah ia̍h'á ê tāichì, sīm̄ sī góa ē koh chòe gōng ê sū, thòngkhó͘, iusiōng sīm̄ sī i só͘ pitiàu ê kengle̍k, i só͘ tamtng ōe khí, hō͘ i piàn chiâⁿ chòe oânchoân ê. Lán ê thiⁿpē, I ê thiàⁿ sī hôténg ê kiankiông, tī lán ê khó͘lān tiong, thîkhàu iusiong nih, I ê sim bô nńgchiáⁿ, bô másiōng lâi pangchān lán, I ài lán tī khó͘lān tiong lâi sêngtióng. “Inūi hiahê sī chiāmsî chhutchāi kakī ê ìsù lâi kéngkài lán; to̍kto̍k chitê sī ūi tio̍h lán ê līek, hō͘ lán ū hūn tī I ê sèngkiat.” (Hipeklâi 12:10)

I hō͘ I ê ‘tióngchú’, Chú Iâso͘ siū tōa ê khó͘lān, tèngsí tī si̍pjīkè, lâi oânsêng kiùsio̍k ê sūgia̍p, tit tio̍h oânchoân ê thiàⁿ. Lán chòe Siōngtè ê kiáⁿjî, kiám m̄ sī iā ài siū koánkàu, ha̍ksi̍p sūnho̍k, tùi siū khó͘ lâi tit êngkng mah?


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.org