《台語荒漠甘泉（全羅版）》

 | | | 轉寄

"Khòaⁿbōe tio̍h ê sìn"

作者 陳清俊 翻譯 2011.04.24

listen


Sì ge̍h jīsì (Sì ge̍h jīcha̍psì ji̍t)

“Sìn chiūsī só͘ ǹgbāng ê ê si̍tchāi, kap bē khòaⁿkìⁿ ê sū ê pînchún.” (Hipeklâi 11:1)

Chinchiàⁿ ê sìnsim chhinchhiūⁿ chiong phoe hiat lo̍hkhì phoetháng íāu chiū bô khì koán i. Bô sìnjīm ê, ná chhinchhiūⁿ chhiú lia̍h tī phoe ê chi̍tpêng, (bô kiàchhut) jiânāu hoânló tùihong ūihô iáubōe hôephoe. Góa ê chutoh'á téng ū phoe, ū ê sī kúinā lépài chêng só͘ siá ê. Sī inūi chūsó͘ bô khaktēng, lāiiông iáubōe hó, chiū bô kiàchhut. Chiah ê phoe tùi góa tùi pa̍tlâng lóng bô līek. Góa nā bô kià chhut, chiū éngoán bōe ta̍t kàu tùihong ê chhiú.

Chinchiàⁿ ê sìnsim iā sī ánni. Sìnsim sī chiong tāichì kauthok Siōngtè, hō͘ I khì chhùlí. Siphian 37:5 sī tùi chittiám ke̍k iúle̍k ê khakjīm, “ Tng lí chiong tāichì kauthok Iâhôhoa, óakhò I, I beh sêngchoân.” I ài lán chiong sū kauthok I, I chiah beh sêngchoân. Sìnsim sī chiapsiū, kóng khah chèngkhak ê, chinchiàⁿ sī tùi Siōngtè tit tio̍h lán ê lémi̍h. Lán siongsìn I, kàu I ê bīnchêng, chiong kakī kauthok hō͘ I, tī I ê lāibīn tit anhioh. Chóngsī lán iáubōe sūnho̍k lâi chiapsiū I íchêng, bōethang chhionghun chai lán só͘ hióngsiū ê hokkhì. Lio̍k tùi “Tītē ná tīthiⁿ” (from Days of Heaven upon Earth)

Ū chi̍t ê lāuthàithài ūi tio̍h i ê kiáⁿ ê chênghêng teh tamiu, Phêsng phoksū (Dr. Payson), siá phoe hō͘ chit ê lāu thàithài, kóng:

“ Lí ūi i kèthâu chhausim. Lí ūi i kîtó, chiū lí íkeng chòekè, iā chiong i kautài hō͘ Siōngtè, lí chiū bô engkai koh ūi i iusiong.” Siōngtè ài lán “Itkhài bo̍htit khòalū”, (Huili̍ppí 4:6) sī bô lâu chi̍ttiám hoânló tī kakī ê simlāi. Lēnggōa chi̍t chat kengbûn, “Lín tio̍h chiong itchhè ê khòalū kauhù Siōngtè” (I Pítek 5:7), iāsī ánni ê ìsù. Nāsī lán íkeng chiong tàⁿ kau hō͘ pa̍tlâng, chit ê tàⁿ kiám iáuōe teh tī lán ê sinchiūⁿ mah? Sīm̄ sī lán koh chiong tàⁿ the̍h tńglâi, lâu tī sin piⁿ, che chiū piáusī lán bô chiong tàⁿ kau hō͘ Siōngtè. Tī lán ê sengoa̍h tiong, góa ánni chhìgiām góa ê kîtó: góa nā chiong chi̍t kiāⁿ sū kauthok Siōngtè, ōe chhinchhiūⁿ Hapná ánni (I Satbó͘jíⁿ 1:18), sim bô iuchhiû, thòngkhó͘, iulū. Góa jīmūi he chiū chèngbêng góa ū sìnsim ê kîtó. Kású góa kîtó liáu, iáuū tāngtàⁿ, góa thang khaktēng góa bô piáuta̍t chhut chinchiàⁿ ê sìnsim.


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.org