《台語荒漠甘泉（全羅版）》

 | | | 轉寄

"Siūkhó͘ ha̍khāu"

作者 陳清俊 翻譯 2012.09.02

listen


Káu ge̍h chhoejī (Káu ge̍h jī ji̍t)

"Inūi íkeng siúⁿsù lín, ... koh ūi tio̍h I siū khó͘." (Huili̍ppí 1:29)

Siōngtè koánlí chi̍tkeng chin kùi ê ha̍khāu, tī i ê kongkhò sī ēng lâu ba̍ksái lâi o̍h ê. Cha̍pchhit sèkí chhengkàutô͘ bo̍ksu, Ba̍ksutē (Richard Baxter) ánni kóng, "Kámsiā Lí gō͘cha̍ppoeh nî lâi tī góa chit ê sinthé ê koánkàu." I tongjiân m̄ sī îit ōe hòa khùnlân chòe sènglī ê lâng.

Lán Thiⁿpē chit keng ha̍khāu tùi lán lâi kóng sī chin kín beh kiatsok. Ha̍kkî bé, chi̍tkang chi̍tkang chiapkūn. Goān lán bô tôphiah kanlân ê kongkhò, iā bô siámkhui koánkàu ê koáiⁿ. Lán nā ōe khoàilo̍k kianchhî kàuté, lán ê biánliû beh kohkhah konghui, thiankok kohkhah tiⁿbi̍t. Ánni lán thang kongêng, kiaungō͘ lâi pitgia̍p. Theodore L. Cuyler

Sèkài siōng bílē ê hûikhì, siōngchió ài tī iônih sio saⁿ pái. Ūê ài sio kohkhah chōe pái. Dresden só͘ chhutsán ê kùitiōng hûi'á lóng ittēng sio saⁿ pái. Ūisímmi̍h pitsu kengle̍k chiahnih koâiⁿ jia̍t neh? Sio chi̍tpái, á sī nn̄gpái kiám bōe sái mah? Bōe ēngtit, hó ê hûi ittēng ài sio saⁿpái, ánni hō͘ kimsek, ângsek kokchióng sektì kèngka iáⁿba̍k bílē, koh bōe thèsek.

Lán sī chiàu chit ê goânlí lâi liapchō ê, jînlūi sengoa̍h tiong ê bôaliān, ná chhinchhiūⁿ hé puttoān ê sioliān lán. Tùi Siōngtè ê untián bílē ê sekchhái tī lán lāibīn hêngsêng, éngoán chhànlān bô thè. Cortland Myers

Sèchiūⁿ siōng súi ê hoe bô khui tī ū ji̍t ê pîⁿiûⁿ,
Sī tī kippiàn tē phòalia̍t ê chio̍hphāng chiūⁿ.
Siūsiong tī honghō͘, héchai, hésoaⁿ hu,
Siōngtè sòesòe siaⁿ itī só͘ ū.
Tùi chhimian, chio̍hphāng piakkhui,
Lâu chhut oa̍hchúi,
Àmsî thiⁿsài sù unjiû lō͘chúi,
Chhengchá, Jînchú lâi chhái hoelúi.


附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.org