《台語荒漠甘泉（全羅版）》

 | | | 轉寄

"Sìn só͘ kiû ê"

作者 陳清俊 翻譯 2008.02.17

listen

Jī ge̍h cha̍pchhit (Jī ge̍h cha̍pchhit ji̍t)

"taⁿ lí tio̍h khílâi, ... khì Góa só͘ siúⁿsù Íseklia̍t ê tōe." (Ioksua 1:2)

Tī chit ê kengbûn, sī kóng tāichì másiōng beh hoatseng ê, m̄ sī kóng chionglâi ē hoatseng, sī hiānchhúsî teh chìnhêng ê tāichì. Kimji̍t, I hō͘ lí kimji̍t ê só͘kiû, lâi chhì lí ê sìnsim. Tng lí pêng sìnsim kiû, Siōngtè chiū puttoān beh hō͘ lí. Kású lí itbī thènghāu, ǹgbāng, chhē kiû, che m̄ sī sìnsim. Jia̍tchhiat ê ǹgbāng, sī bô kàugia̍h, m̄ sī sìnsim. Inūi "Sìn chiūsī só͘ ǹgbāng ê ê si̍tchāi, kap bē khòaⁿkìⁿ ê sū ê pînchún." (Hipeklâi 11:1) Chú ài lán pêng sìnsim ê kîtó sī ánni, "Kìⁿnā lín só͘ kîtó lâi kiû ê, tio̍h sìn sī íkeng tit tio̍h, chiū beh kā lín chiâⁿ." (Mákhó 11:24) Lán hiānchāi ài sìn sī íkeng tit tio̍h lah. Lán beh kap Siōngtè tī éngoán ê Hiānchāi saⁿ tú tio̍h, lán ū chòe kàu ánni mah? tùi "Ioksua" A.B. Simpson tùchok
Chinsi̍t ê sìnsim sī khò Siōngtè, iā iáu bōe hoatseng chiū sìn ū. Tongjiân lán siôngsiông suiàu ū chèngkù chai lán ê só͘ kiû ū siū èngún, chiah beh siongsìn. Chóngsī lán sī "inūi goán teh kiâⁿ, sī tùi sìn" (Ṳ Kolîmto 5:7) bô suiàu chèngkù, kantaⁿ suiàu Siōngtè ê ōegú chiū kàugia̍h. I bat kóng, lán siongsìn, tāichì chiū ánni beh chiâⁿ. Sīmchì, tng khoânkéng kap sūchêng teh hoatseng lóng chhinchhiūⁿ kap Siōngtè só͘ kóng ê, teh sionghoán, chinsi̍t ê sìnsim beh kiankò͘ pēng chichhî lán.
Sijîn kóng, "Góa nā m̄ sìn tī oa̍hlâng ê tōe tit tio̍h khòaⁿkìⁿ Iâhôhoa ê unhūi, chiū tekkhak choa̍tbāng." (Siphian 27:13) Sijîn pēng bô kìⁿ tio̍h i ê kîtó siū èngún, tānsī i kiansìn ittēng ōe, i ê sìn kiankò͘ i.
Ū ittēng ōe tit tio̍h ê sìnsim, ōe pósiú lán bô sittáⁿ. Lán beh chhiò kóng, he sī bô khólêng ê sū, tī Ânghái tiong beh khui chi̍t tiâu lō͘. Chóngsī Siōngtè ū ánni chòe lah. Tī lâng só͘ khòaⁿ chòe bô khólêng ê khoânkéng ē, che sī giâmkeh sìnsim ê khógiām, sī ēng lâi hō͘ sìnsim ê tióngtōa, kap kakiông.
Hāmlo̍h tī kanlân tiong, kè liáu tn̂gtn̂g ê o͘àmmî, kap chhauhoân ê ji̍tsî, teh thènghāu Siōngtè ōe tāngkang, beh tamsim I kiám m̄ chhap á mah? Giâ khí lí ê thâu, khuichhùi oló I, chínkiù chiū hiòng lí lâi lah. tùi "Oló ê sengoa̍h"

附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com.tw