《台語荒漠甘泉（全羅版）》

 | | | 轉寄

“Chì bîsòe”

作者 陳清俊 翻譯 2008.02.24

listen
Jī ge̍h jīsì (Jī ge̍h jīcha̍psì ji̍t)

“Iokhān lóng bô kiâⁿ sînjiah, to̍kto̍k Iokhān só͘ kóng chí chit lâng ê, lóng sī chin.” (Iokhān hokim 10:41)

Lí khólêng bô móaì lí púnsin, lí m̄ sī thianchâi, bô te̍ksû ê châilêng, itseng pêngpêng tāmtām kèji̍t. Sengoa̍h tantiāu, bô símmi̍h chhùbī, ta̍ttit thang lâi thêkhí ê sū. Suijiân sī ánni, lí iáu sī oa̍h kah chin ū kèta̍t.
Kiâⁿ sóelé Iokhān itseng bô kiâⁿ chi̍tkiāⁿ ê sînjiah, Iâso͘ khiok kóng,"Hūjînlâng só͘ siⁿ bē ū khah tōa Iokhān ê;" (Lō͘ka 7:28) I ê sùbēng sī "ūi tio̍h kng chòe kanchèng nātiāⁿ." (Iokhān hokim 1:8) Che iā sī lí góa ê sùbēng. Kiâⁿ sóelé Iokhān boánchiok chòe chit ê siaⁿim, chíiàu ū lâng thiaⁿ tio̍h, ōe siūⁿ tio̍h Kitok chiū kàugia̍h.
Lâng engkai kamsim chòe hit ê hō͘ lâng ōe thiaⁿkìⁿ, khiok bōe thang khòaⁿ tio̍h ê siaⁿim, á sī chi̍tê kiàⁿ ê polê, lâng bīntùi kiàⁿ, khòaⁿ tio̍h ê sī Jînchú Iâso͘ ê chhànlān êngkng, m̄ sī polê. Lâng engkai kamsim lo̍kì chòe thiⁿ kng sî ê liânghong, soankò "lêbêng kàu lah," "lêbêng lâi lah," iā koh khòaⁿ bōe tio̍h, chēngchēng siausit khì.
Lán múi chi̍t ji̍t ê kangchok suijiân bô símmi̍h tōa liáuputkhí ê sū, tānsī Siōngtè lóng chai, lóng khòaⁿ tio̍h lah. Siatsú sengoa̍h tī kap chin oh tîⁿ ê lâng ê tiongkan, siathoat ēng thiàⁿ lâi iâⁿ i. Nāsī bat chòekè tōa sitchhò, m̄ thang hō͘ sitchhò ê ìmiáⁿ énghióng lí íāu ê jînseng, chiong che só tī simté, hoántńg tùi che lâi tit le̍kliōng, thoànliān kakī ê phínkeh.
Lán kîsi̍t chòe liáu chin chōe hó sū, chhiaukè lán só͘ chai. Kimji̍t lán iāchéng, kap lâng hunhióng Kitok ê chintō. Ū chi̍t kang, ū lâng kóng, i siōng tāiseng chai Kitok sī tùi lí hia. Tng góa līpia̍t ê sî, góa bô khòasim bōngpâi ê súibái, tōasòe, góa só͘ ài chai ê sī phó͘phó͘ thongthong ê lâng tī góa ê bōng chêng kóng, “i sī chi̍t ê hólâng, i bô kiâⁿ kè símmi̍h sînjiah, chóngsī i chiong Kitok kàisiāu hō͘ góa, hō͘ góa thang jīnbat Chú Iâso͘” chiū kàugia̍h lah. George Matheson


Lí só͘ khǹgba̍t ê lâng (Siphian 83:3)

Chhiūhio̍h ē,
Thô͘ni̍h hoatchhut chhiⁿchhiⁿ ê hio̍h,
Hoaⁿhí chhunthiⁿ ê ho͘kiò,
Chháu pàng chhut hunhong phangbī teh chhiò,
Tapèng joa̍hthiⁿ hoe khui, ji̍t chiò.

Chhiūhio̍h ē,
Poahkhui chhiūhio̍h, hiánchhut bílē,
Lán só͘ bô siūⁿ tio̍h ê tē,
Ū âng, ū pe̍h ê gō͘ge̍h hoe,
Thu̍tjiân ê kng lâi tián chhut in ê hoe.

Chhiūhio̍h ē,
Sèkan kiám ū chhinchhiūⁿ chit khoán hoe ê jînchâi?
Sèng koh siān ê kiâⁿchòe, chí hō͘ Thiⁿpē chai.
Siuⁿ hó, kiâⁿ siān, tiāmtiām lâi,
Hoe m̂, hoe lúi khui, hán tit khòaⁿ tio̍h ê hongchhái.

Chhiūhio̍h ē,
Sìnsim sìnkhò sûnkiat ê hoe sūi,
Chiapchhiok tio̍h thiⁿ ni̍h ê êngkng kap konghui,
Siū ap, siū teh ê simlêng tián khui,
Hiánchhut bílē, thiàⁿ ê hoe lúi.

Chhiūhio̍h ē,
Tī imiáⁿ, tióngsêng chi̍t tōa tui
Súisúi tióngsêng ê hoelúi,
Únchông tī hoeni̍h, ûilûi
Kamtiⁿ, te̍kiú ê phangbī chin kokùi.

Lán ba̍kchiu só͘ khòaⁿ bōe tio̍h,
Chú khiok chai múi chi̍t lúi, múi chi̍t hio̍h,
Kamsim thènghāu I ê kng chiò,
Ti̍t kàu I kohlâi ê sî, ê thiàⁿsioh.
Chhinchū hiankhui chiah ê chhiūhio̍h.

Siōngtè tùi phó͘thong ê jînkûn tiong, kéngsoán I siōng pókùi ê kanglâng. (chhamkhó Lō͘ka 14:23)

附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com.tw