《台語荒漠甘泉（全羅版）》

 | | | 轉寄

"Siankhó͘ hō͘kam"

作者 陳清俊 翻譯 2008.05.25

listen

Gō͘ ge̍h jīgō͘ (Gō͘ ge̍h jīcha̍pgō͘ ji̍t)

"Só͘í góa inūi siū kéng ê lâng lâi thunlún itchhè ê sū, hō͘ in iā ū hūn tī Kitok Iâso͘ ê chínkiù, kap éng sètāi ê êngkng." (Ṳ Thêmô͘thài 2:10)

Ah, Iokpek chē tī héhu téng, siūⁿ Siōngtè hō͘ i só͘ siū ê khó͘, hō͘ íāu ê chhengchheng bānbān lâng ōe thang siūⁿ i só͘ siū ê khógiām. I ê kenggiām chiâⁿchòe choânsèkài ê lâng tī siūkhó͘ tiong tit ióngkhì.
Bô lâng ōe kakī chi̍t lâng khiākhí. Iokpek ê kò͘sū chhinchhiūⁿ lí góa chi̍tiūⁿ, putkò i chiong i ê kò͘sū siá chhut lâi hō͘ lán khòaⁿ. Lâng ōe kìtit Iokpek ê khó͘lān, só͘ kengkè ê khógiām. Nābô chiah ê khó͘lān, lán khólêng chiū bōe tha̍k tio̍h i ê tāichì lah.
M̄ chai tī lán thâuchêng ū símmi̍h khógiām beh lâi, lán tī hùntàu tiong iā khólêng bô khòaⁿkìⁿ kng, chóngsī lán siongsìn, chhinchhiūⁿ Iokpek chi̍tiūⁿ, chiah ê siūkhó͘ ê ji̍t beh chiâⁿchòe lán kengle̍k siōng ū ìgī ê ji̍tchí. Robert Collyer
Sáng bô thégiām tio̍h, tī lán siōng pisiong ê ji̍tchí siôngsiông sī lán siōng kam ê ji̍t mah? Hoánbīn, nāsī só͘ kè ê ji̍t, lán móabīn chhunhong, khinkhin sangsang tī Siōngtè ê chhiⁿchhùi chháupo͘, koh ū chhunthiⁿ ê hoe tī hit tiongkan, lán simlêng ê lêngle̍k chiū siôngsiông sī lōnghùi khì lah.
Khinsang khoàilo̍k ê lâng siôngsiông bōe thégiām tio̍h jînseng siōng chhim ê ìgī. Tongjiân chit chióng ê jînseng sī unsù, sī boánì ê, chóngsī hit ê boánì sī chhiánchhián. I ê sim sī oe̍hoe̍h, suijiân I lōechāi ū siōngchhim siōngkoâiⁿ ê púnlêng, chóngsī bô hoattián chhutlâi. Sìⁿmiā kàu chīnbé, iáu bô théhōe tio̍h chhimtn̂g hongsēng ê chinchiàⁿ khoàilo̍k.
Ōe kìtit, Iâso͘ kóng, "Iubūn ê lâng ū hokkhì." (Máthài 5:4) Tī tangthiⁿ siōng o͘àm ê mîsî, thiⁿchhiⁿ hiánchhut siōng kng. Tī lâng só͘ kiâⁿ bōe kàu, koâiⁿsoaⁿ ū pengseh ê só͘chāi, hoe khui kàu chin súi.
Siōngtè ná chhinchhiūⁿ ēng thòngkhó͘ ê aple̍k hō͘ I ê èngún si̍thiān, tùi I ê chiúapkhut sánseng siōng tiⁿ ê phûtô chiap. Chí ū siū kè thòngkhó͘ ê lâng chiah ōe thégiām kámsiā tio̍h hit ê "siūkhó͘ ê Jînchú" (Ísàia 53:3) jōa tōa ê unjiû.
Khólêng lí hiānchāi tútú tī thàiiông bô kàu ê ji̍tchí, tn̂gkî imim àmàm ê kî, che sī Siōngtè tìhūi ūi lí chúnpī ê. Inūi tī tn̂gtn̂g ê joa̍hthiⁿ, lí beh piàn chòe khònghān ê tē, tasò ê soabô͘. Lí ê Chú chai che itchhè. Hûn kap ji̍tthâu lóng siū I chíhui.
Lâng nā kā chi̍t ê lāu So͘keklân (Scottish) tiam phêôe saihū kóng, "o͘im thiⁿ" i chiū hôetap kóng, "bô m̄ tio̍h, chóngsī lí kiám bô khòaⁿ tio̍h hit chi̍tsut'á ê chheng thiⁿ mah?"

附註:《荒漠甘泉》漢羅版kap "Hongbô͘ Kamchôaⁿ"全羅版附CD，由人光出版社出版， 歡迎洽購(062356277分機(122~124) ， email:book@pctpress.com.tw